Психолог танымал тұлғаның қазасы неге жақын адамыңды жоғалтқандай әсер ететінін түсіндірді

Австралиялық клиникалық психолог танымал тұлғаларға деген біржақты бауыр басу механизмдері мен олар қайтыс болғаннан кейінгі қайғыны жеңу жолдары туралы айтып берді, деп жазды The Guardian-ға сілтеме жасаған KAZ.NUR.KZ.

Параәлеуметтік қарым-қатынас – бұл адамның көпшілікке танымал тұлғаға немесе медиа кейіпкерге қатты бауыр басып, ал оның өзі үшін мүлдем бейтаныс адам болып қала беретін біржақты психологиялық байланыс. Мельбурндік клиникалық психолог Бьянка Денни The Guardian басылымына жазған мақаласында танымал әнші қайтыс болғаннан кейін депрессия мен ұйқысыздыққа шалдыққан Джоди есімді пациентінің мысалында жұлдыздарға эмоционалдық тәуелділік феноменін талдады.

Деннидің айтуынша, біржақты байланыстар қазіргі өмірдің қалыпты бөлігіне айналған, өйткені олар адамдарға күнделікті күйбең тірліктен уақытша алшақтауға мүмкіндік береді. Алайда кей жағдайда бұл тым қатты бауыр басуға әкеп соғады. Пациент үшін әншінің музыкасы өмірінің қиын кезеңінде демеу болғандықтан, оның қазасы бұрынғы жарақаттың қайталануына себеп болды. Сонымен қатар мұндай біржақты байланыстар қауіпсіз болып көрінеді, себебі оларда шынайы қарым-қатынасқа тән қабылданбау немесе жанжал қаупі жоқ.

Стресс деңгейін төмендету үшін психолог цифрлық контентті шектеу әдісін қолданды: арнайы қосымшалардың көмегімен әлеуметтік желілерді пайдалану және жаңалықтар оқу уақыты күніне 20 минутқа дейін қысқартылды. Сондай-ақ терапия шынайы әлеуметтік байланыстарды біртіндеп дамытуды — жергілікті қоғамдастықтарға баруды, хобби табуды және ескі достармен қарым-қатынасты қалпына келтіруді қамтиды. Сарапшы тек шынайы қарым-қатынас қана параәлеуметтік байланыстар бере алмайтын өзара түсіністікті қамтамасыз ететінін атап өтті.

Мәтіннен қате тапсаңыз, бізге жазыңыз