Дәмханадағы музыканың өзгеруі келушілердің тағам таңдауына әсер етті

pj Science of Food журналында жарияланған эксперимент нәтижесі бойынша, сергек музыкаға қарағанда тыныштандыратын әуендер пайдалы тағамдарды таңдауға ықпал етеді. Бұл туралы News-Medical басылымына сілтеме жасаған KAZ.NUR.KZ хабарлады.

Ғалымдар тобы фондық музыканың эмоционалдық әсерінің пайдалы тағамдарды таңдауға қалай әсер ететінін анықтау үшін төрт кезеңнен тұратын зерттеу жүргізді. npj Science of Food ғылыми журналында жарияланған жұмыс нәтижелері төмен қарқынды, тыныштандыратын музыканың үйден тыс жерде салауатты тамақтануға септігін тигізетінін көрсетті.

Зерттеудің бірінші кезеңі университет асханасындағы далалық эксперимент түрінде өтті. Сегіз күн бойы ғалымдар сатылған тағамдарды пайдалы және пайдалы емес деп бөліп, анонимді чектерді тіркеп отырды. Тыныш музыка ойнаған кезде пайдалы тағамдардың үлесі шамамен 19%-ды құраса, динамикалық әуендер кезінде бұл көрсеткіш 14%-ға дейін төмендеді. Кейін зерттеушілер респонденттердің қатысуымен үш сценарийлік эксперимент өткізіп, оларға әр түрлі ырғақтағы хип-хоп пен джаз үзінділерін тыңдатып, мәзірді бағалатты.

Эксперименттер тыныш аудиофонның пайдалы тағамдарға тапсырыс беру ниетін арттырып, ақпаратты қабылдауды жақсартатынын растады. Фондық шу немесе сергек музыка назарды бөліп жібермеген кезде, қатысушылар мәзірді оңайырақ бағалаған. Зерттеу авторлары бұл жұмыстың Қытай мен Макаода жүргізілгенін атап өтіп, ауқымды қорытынды жасау үшін басқа елдерде қосымша тексерулер қажет екенін ескертті. Дегенмен фондық музыка қоғамдық тамақтану орындарындағы тиімді әрі байқалмайтын құрал ретінде қарастырылуда.

Мәтіннен қате тапсаңыз,бізге жазыңыз