Шоколад иісі ерлерге жағымды әсер ететіні анықталды

Малайя университетінің ғалымдары жаттығу кезінде какао иісін иіскеу жүктеме көлемін арттыруға мүмкіндік беретінін анықтады, деп жазды ScienceDaily-ге сілтеме жасаған KAZ.NUR.KZ.

Жаттығу алдында және жаттығу арасында шоколад иісін сезіну шаршау сезімінсіз өнімділікті айтарлықтай арттыруы мүмкін. Frontiers in Physiology журналында жарияланған зерттеуде Малайя университетінің ғалымдары осындай қорытындыға келді. Доцент Мохамед Нашрудин бин Нахарудиннің жетекшілігімен өткен тәжірибеге 20 мен 25 жас аралығындағы, дене шынығуы орташа 23 жас жігіт қатысты.

Сынақ басталмас бұрын қатысушылар кемінде 10 сағат бойы аш жүрді. Содан кейін олар балқытылған қара шоколад (90% какао), сүтті шоколад (60% какао) немесе бақылау тобы ретінде су иісін иіскейтін топтарға бөлінді. Тренажерде аяқты жазу жаттығуын орындау кезінде 90%-дық қара шоколад иісін иіскеу қатысушыларға бақылау тобымен салыстырғанда орта есеппен 18 қайталауды артық жасауға мүмкіндік берді, ал сүтті шоколад иісі 9 қайталауды қосты. Бұл ретте спортшылар жүктеменің ауырлығы артқанын сезбеген.

Иістер тәбетке де әр түрлі әсер етті. Қара шоколад иісі тамақтанар алдында аштық сезімін басып, тоқтық сезімін арттырса, қатысушылар үшін жағымдырақ сүтті шоколад иісі ләззат алу стимулы ретінде жұмыс істеді. Зерттеу авторларының пікірінше, ми таныс иістерді тоқтықпен байланыстырып, ағзаны тамақ күту күйіне ауыстырады. Биохимиялық механизмдерді растау және әсерді адамдардың басқа топтарында тексеру үшін ғалымдар қосымша зерттеулер жүргізуді жоспарлап отыр.

Мәтіннен қате тапсаңыз,бізге жазыңыз