Ғалымдар балалардың тамақтану рационы қан құрамында айқын биологиялық із қалдыратынын анықтады

European Journal of Nutrition журналында жарияланған зерттеу қан метаболиттерін талдау арқылы балалардың диеталық рационының сапасын дәл анықтауға болатынын көрсетті, деп жазды News-Medical-ға сілтеме жасаған KAZ.NUR.KZ.

Халықаралық зерттеушілер тобы балалардың күнделікті тамақтану рационы олардың қанында айқын метаболомдық іздер қалдыратынын анықтады. European Journal of Nutrition журналында жарияланған зерттеуде EU Childhood Obesity Project еуропалық балалар семіздігін зерттеу жобасына қатысқан 5,5 және 8 жастағы 421 баланың деректері талданды. Мамандар қан метаболиттерінің тамақтанудың үш негізгі моделімен байланысын бағалады: салауатты рацион (CORE), жануарлар ақуызы жоғары мәзір (PROT) және қант пен сапасыз майлар басым рацион (F&S).

Талдау нәтижесі көрсеткендей, балыққа, көкөністерге және зәйтүн майына бай салауатты CORE рационы құрамында докозагексаен қышқылы (ДГК) бар фосфатидилхолиндердің жоғары деңгейімен, сондай-ақ Фишер индексінің жоғары көрсеткіштерімен байланысты. Керісінше, қаныққан майлар мен тәтті сусындарды қамтитын F&S рационы пайдалы лизофосфатидилхолиндер деңгейін төмендетіп, қарама-қарсы нәтиже көрсетті. Метаболиттердің белгілі бір топтары мен май қышқылдарының арақатынасы бақылаудың екі кезеңінде де тұрақты болып шықты.

Зерттеу авторлары қан метаболиттерін объективті талдау ата-аналардың субъективті сауалнамаларындағы дәлсіздіктерді айналып өтуге және тағамның денсаулыққа әсерін дәлірек бағалауға көмектесетінін атап өтті. Нәтижелер тәуелсіз растауды қажет еткенімен, метаболомдық профиль балалар тамақтануының сапасына жоғары сезімталдықты көрсетіп отыр.

Мәтіннен қате тапсаңыз,бізге жазыңыз