Ғалымдар күніне төрт-алты порция тұтас дәнді өнімдерді тұтыну жүрек ауруларының қаупін азайтатынын анықтады

ScienceDaily басылымының хабарлауынша, European Heart Journal журналында жарияланған ауқымды метаталдау нәтижелері рационға тұтас дәнді өнімдерді қосу холестерин деңгейін, қан қысымы мен дене салмағын төмендететінін аңдатты, деп жазды KAZ.NUR.KZ.

Күніне 60-тан 100 грамға дейін (құрғақ салмақта) тұтас дәнді өнімдерді тұтыну жүрек-қан тамырлары жүйесінің негізгі көрсеткіштерін кешенді түрде жақсартуға ықпал етеді. Азия, Еуропа, АҚШ, Канада, Австралия мен Бразилия елдерінен 6500-ден астам адам қатысқан 87 клиникалық зерттеуді қамтыған жүйелі шолу мен метаталдау авторлары осындай қорытындыға келді. Ғылыми жұмыс нәтижелері European Heart Journal журналында жарияланды.

Зерттеуді Ирандағы Тебриз медицина ғылымдары университетінің докторы Хельда Тутунчи басқарды. Талдау көрсеткендей, күнделікті төрт-алты порция тұтас дәнді өнімдерді, мысалы, сұлы жармасын, тұтас дәнді нанды немесе қоңыр күрішті тұтыну дене салмағының азаюына, бел көлемінің кішірейюіне, артериялық қысымның қалыпқа келуіне, сондай-ақ қандағы жалпы холестерин, төмен тығыздықтағы липопротеиндер, глюкоза мен интерлейкин-6 қабыну маркері деңгейінің төмендеуіне әкеледі.

Копенгагендегі Дания онкологиялық институтының докторы Сесили Кюре ілеспе редакциялық мақаласында тазартылған дәнді өнімдерді өңдеуі аз тұтас дәнді өнімдермен алмастыру шағын болса да, маңызды жиынтық әсер беретінін атап өтті. Мамандардың пікірінше, тұтас дәнді дақылдар ағзаға бірден бірнеше метаболикалық жол арқылы әсер етіп, кардиометаболикалық аурулардың дамуын баяулатады.

Мәтіннен қате тапсаңыз,бізге жазыңыз