Ғалымдар қара және жасыл күріштің денсаулыққа пайдалы жасырын қасиеттерін анықтады

Зерттеушілер жапон күрішінің пигменттелген сорттарында пайдалы липидтер бар екенін және олардың кәдімгі ақ күрішке қарағанда баяу қорытылатынын анықтады. ScienceDaily басылымының жазуынша, бұл диабеттің алдын алуға көмектесуі мүмкін, деп хабарлады KAZ.NUR.KZ.

Күріш жер шары халқының жартысынан көбі үшін негізгі азық-түлік өнімі болып қала береді. Оның құрамының 85%-дан астамы крахмалдан тұрады. Липидтердің үлесі небәрі 2%-ға жуығын құрағанымен, дәл осы заттар дәннің тағамдық құндылығына, дәмі мен қасиеттеріне әсер етеді.

Доцент Сиддабасаве Гоуда бастаған ғалымдар тобы жапон күрішінің "японика" типті 56 сортын, соның ішінде қоңыр, қызыл, жасыл және қара түрлерін талдап шықты. Сұйықтық хроматографиясы мен масс-спектрометрия әдістерінің көмегімен зерттеушілер бес негізгі топқа бөлінген 196 түрлі липид молекуласын анықтады.

Қара және жасыл күріш ең жоғары құндылыққа ие болды. Олардың құрамынан күріш үшін алғаш рет май қышқылдары мен гидрокси-орташа тізбекті май қышқылдарының күрделі эфирлері (FAHMFAs), сондай-ақ N-ацил-лизофосфатидилэтаноламиндер (LNAPEs) табылды. Белгілі бір биологиялық жүйелерде бұл липидтер қабынуға қарсы белсенділік танытып, метаболикалық денсаулықты жақсартады.

Адамның ас қорыту процесін ескеретін зертханалық сынақтар қара және жасыл күріштегі крахмалдың кәдімгі ақ күріштегі крахмалға қарағанда ферменттер арқылы баяу ыдырайтынын көрсетті. Бұл глюкозаның қанға біркелкі түсуін қамтамасыз етіп, қант деңгейінің күрт көтерілуіне жол бермейді.

Зерттеу авторларының пікірінше, бұл нәтижелер тамақ өнеркәсібіне зат алмасуы бұзылған адамдар үшін функционалды тағамдар жасауға, ал тұтынушыларға екінші типті диабет пен жүрек-қан тамырлары ауруларының алдын алу үшін пайдалы күріш сорттарын саналы түрде таңдауға көмектеседі.

Мәтіннен қате тапсаңыз,бізге жазыңыз