Ғалымдар жылдам ұйқы фазасының ұзақтығы ондаған ауыр дерттің туындау қаупін азайтатынын анықтады

Medical News Today басылымының хабарлауынша, 100 мыңға жуық адамның деректеріне жүргізілген ауқымды зерттеу нәтижелері жылдам ұйқы фазасының ұзақ болуы 80-нен астам түрлі аурудың пайда болу ықтималдығын төмендететінін көрсетті, деп жазды KAZ.NUR.KZ.

Жылдам ұйқы фазасының ұзаруы жүрек жеткіліксіздігі, жүректің ишемиялық ауруы, деменция және шашыраңқы склерозды қоса алғанда, 80-нен астам аурудың даму қаупінің төмендеуіне әсер етеді. Мұндай қорытындыны PLOS Medicine журналында жарияланған ауқымды зерттеу авторлары жасап отыр.

Зерттеу барысында Ұлыбританияның UK Biobank деректер базасынан алынған 95 559 ересек тұрғынның медициналық көрсеткіштері талданды. Қатысушылардың орташа жасы 56,2 жасты құрады. Ұйқы сапасын бағалау үшін еріктілер бір апта бойы білектеріне акселерометр тағып жүрді. Бұл өз бетінше жүргізілетін сауалнамаларға тән қателіктерден аулақ болып, ұйқының әр түрлі фазаларының ұзақтығын дәлірек бақылауға мүмкіндік берді.

Кейін ғалымдар қатысушылардың денсаулық жағдайын орта есеппен 8,9 жыл бойы бақылады. Талдау нәтижесі көрсеткендей, жылдам ұйқы фазасының (REM-ұйқы) ұзақ болуы 83 аурудың қаупін төмендетуге мүмкіндік берген. Өз кезегінде, терең ұйқы фазасының ұзақтығының артуы 2-типті диабет, ауыр депрессиялық бұзылыс, ұйқы апноэсы және Паркинсон ауруын қоса алғанда, жеті патологияның даму ықтималдығының төмендеуіне септік болған.

Зерттеушілер сондай-ақ ұйқының оңтайлы ұзақтығы тәулігіне 6-дан 8 сағатқа дейін екенін анықтады. Бұл ретте түнде жиі ояну және ұйқы кестесінің тұрақсыздығы мазасыздық күйлерінің, депрессияның және іштің ауыруының пайда болу ықтималдығын арттырған. Жұмыс авторлары алынған нәтижелер ұйқы құрылымының адамның ұзақ мерзімді денсаулығына әсерін дәлірек анықтауға көмектесетінін атап өтті.

Мәтіннен қате тапсаңыз,бізге жазыңыз