Ғалымдар: Іш бұлшықеттерінің жиырылуы мидағы қан айналымын жылдамдатады

АҚШ ғалымдары іш бұлшықеттерінің қозғалысы мен ширығуы ми тамырларының лезде тартылуына ықпал етіп, қан айналымын реттейтінін анықтады, деп хабарлады News Medical-ға сілтеме жасаған KAZ.NUR.KZ.

Қозғалыс, дене жаттығулары немесе жөтелу кезінде іш бұлшықеттерінің ширығуы мидағы қан айналымын реттеуде маңызды рөл атқарады. Пенсильвания штаты университеті мен Мичиган штаты университетінің зерттеушілері осындай тұжырымға келді. Тышқандарға жүргізілген зерттеу нәтижелері Proceedings of the National Academy of Sciences ғылыми журналында жарияланды.

Тәжірибе барысында ғалымдар іш бұлшықеттерінің жиырылуы омыртқа арқылы мимен байланысқан қан тамырларындағы қысымды арттыратынын анықтады. Бұл мидың ірі тамырлары — жоғарғы сагитталды синус пен оған құятын көпірлік тамырлардың өте жылдам тарылуына әкеледі. Тарылу небәрі оннан бір секунд ішінде болады, бұл артериялардың реакциясынан әлдеқайда жылдам. Бұған дейін тамырлар тек пассивті арналар қызметін атқарады, ал қан айналымын реттеу тек артериялар мен капиллярларға байланысты деп есептелетін.

Цингуан Чжан мен Патрик Дрю бастаған зерттеу авторлары кеміргіштер мен адамның тамыр жүйесінің анатомиялық құрылымы бірдей екенін атап өтті. Бұл жаңалық физикалық белсенділіктің ми денсаулығына неліктен оң әсер ететінін, сондай-ақ қозғалыс кезінде бас ауруы мен мигреньнің неліктен күшеюі мүмкін екенін түсінуге көмектеседі. Тамырлар мидың қатты қабығында орналасқан, онда қысымның күрт өзгеруіне жауап беретін ауырсыну рецепторлары бар.

Мәтіннен қате тапсаңыз, бізге жазыңыз