Ғалымдар: Теледидар көру мен компьютерде жұмыс істеу қарт адамдардың миына әрқалай әсер етеді

News Medical басылымының хабарлауынша, зерттеушілер теледидар көру когнитивтік функцияларды төмендететінін, ал компьютерді орташа деңгейде пайдалану олардың сақталуына ықпал ететінін анықтады, деп жазды KAZ.NUR.KZ.

Халықаралық ғалымдар тобы егде жастағы адамдардың ми денсаулығына экран алдында өткізілген уақыттың әр түрлі түрлері қалай әсер ететінін анықтау үшін зерттеу жүргізді. npj Digital Medicine журналында жарияланған жұмыста зерттеушілер төрт ірі когортаның (SHARE, ELSA-HCAP, HRS-HCAP және NHANES) 8 996 қатысушысының бақылау деректерін және генетикалық себеп-салдарлық байланысты бағалау үшін мендельдік рандомизация әдісін біріктірді.

Нәтижелер әр түрлі цифрлық құрылғыларды пайдаланудың қарама-қарсы әсерін көрсетті. Теледидарды ұзақ уақыт көру (күніне төрт сағаттан артық) когнитивтік функциялардың жалпы деңгейінің төмендететіні, атап айтқанда, ақпаратты бірден есте сақтау қабілетін нашарлататыны анықталды. Ал компьютерде жұмыс істеу немесе уақыт өткізу ми жұмысының көрсеткіштерін, әсіресе ақпаратты өңдеу жылдамдығы мен кейіннен еске түсіру қабілетін жақсартатыны белігілі болды. Ең айқын оң әсер компьютерді күніне бір-үш сағат пайдаланған кезде байқалды, алайда төрт сағаттық межеден асқанда пайдасы азайды.

Мендельдік рандомизация әдісі генетикалық тұрғыдан бейімделген ұзақ уақыт теледидар көрудің мидың сол жақ аралшық бөлігі көлемінің кішіреюімен корреляцияланатынын көрсетті, бұл когнитивтік қабілеттерге тигізетін теріс әсердің шамамен 15%-ын қамтиды. Сонымен қатар зерттеушілер экран алдында өткізілген уақыт пен деменцияның әр түрлі түрлерінің даму қаупі арасында байланыс барын анықтамады. Авторлар цифрлық технологиялармен өзара әрекеттесудің пассивті және активті форматтарын ажырату қажеттігін атап өтті.

Мәтіннен қате тапсаңыз, бізге жазыңыз