ЖИ-ге негізделген "сөйлеу сағаты" биологиялық жасты, ми жағдайын және деменция белгілерін анықтауды үйренді

News Medical басылымының хабарлауынша, ғалымдар сөйлеудің акустикалық және тілдік параметрлері бойынша хронологиялық жасты және қартаю қаупін бағалайтын алгоритм әзірледі, деп жазды KAZ.NUR.KZ.

Дублиндегі Тринити колледжінің профессоры Агустин Ибаньес бастаған халықаралық зерттеушілер тобы адамның жасын сөйлеу мәнеріне қарай анықтай алатын машиналық оқытуға негізделген "сөйлеу сағатын" жасап шығарды. Аргентина, Чили, Колумбия, Мексика және Перуден келген 3000-ға жуық испан тілді қатысушыны қамтыған жұмыстың нәтижелері Science Advances журналында жарияланды. Алгоритм сөйлеу қарқыны, кідірістер, дауыс биіктігі, эмоционалды реңк, сөздік қор және мәтіннің мағыналық дәлдігі сияқты жүздеген параметрді талдайды.

Зерттеу нәтижесінде нақты жас пен жасанды интеллект есептеген жас арасындағы айырмашылықтың ми мен ағзаның жедел қартаюына сәйкес келетіні анықталды. Сөйлеу мәнері нормадан "кәрірек" естілген қатысушыларда когнитивтік функциялардың нашарлауы, ми құрылымындағы өзгерістер және ДНҚ-ның эпигенетикалық сағатының жеделдеуі байқалды. Әзірленген әдіс дені сау адамдарды Альцгеймер ауруы мен фронтотемпоральдық деменциясы бар науқастардан сәтті ажырата алды. Альцгеймер ауруы кезінде сөйлеудегі ауытқулар плазмалық биомаркер p-tau217 деңгейінің жоғарылауымен сәйкес келді. Сонымен қатар бұл көрсеткішке білім деңгейі мен медициналық қызметке қолжетімділікті қоса алғанда, әлеуметтік факторлар да әсер етті.

Ғалымдар бұл әдістің әзірге дайын диагностикалық тест емес екенін, өйткені оны клиникалық сынақтан өткізіп, басқа тілдерде тексеру қажеттігін атап өтті. Дегенмен болашақта сөйлеуді талдау қартаю процестерін бақылаудың арзан әрі қолжетімді құралына айналуы мүмкін.

Мәтіннен қате тапсаңыз, бізге жазыңыз