Ерлерге арналған контрацепциялық препараттарды әзірлеу бойынша сынақтар сәтті өтті

The Guardian басылымының жазуынша, ғалымдар ерлерге арналған гормональдық гельдің қауіпсіздігі мен толық қалпына келу мүмкіндігін растайтын халықаралық зерттеулердің қорытындысын жария етті, деп хабарлады KAZ.NUR.KZ.

Ерлерге арналған контрацепция алдағы 5–10 жыл ішінде әлемдік нарықта пайда болуы мүмкін. Халықаралық ғалымдар тобы қатысушылар күн сайын иықтарына жағатын тестостерон мен прогестин негізіндегі арнайы гельге ауқымды клиникалық сынақтар жүргізді. The Guardian басылымы хабарлағандай, профессор Ричард Андерсонның жетекшілігімен Эдинбург университетінің когортасын қоса алғанда, зерттеу барысында препарат жоғары тиімділікті көрсетті. Бақылау кезеңінде қатысушылар арасында жоспарланбаған жүктілік жағдайы тіркелмеген, ал жанама әсерлерге байланысты зерттеуден бас тартқандардың үлесі бірнеше пайызды ғана құрады.

Әзірленіп жатқан әдістің басты артықшылығы – сперматозоидтар санының толық қалпына келу мүмкіндігі. Курсты аяқтағаннан кейін (әдетте 18 айға дейін созылады) ерлердегі сперматозоидтар саны толығымен қалыпқа келіп, кейіннен жұптарда дені сау бала дүниеге келген. Ерлер контрацепциясы саласындағы ғылыми зерттеулер ДДСҰ-ның қолдауымен 1980 жылдардың соңынан бері жүргізіліп келеді, алайда ұзақ уақыт бойы дозалаудағы қиындықтар мен жанама әсерлер қаупіне байланысты тежеліп келді.

Гормональдық гельден бөлек, қазіргі таңда гормондар деңгейіне әсер етпей, сперматозоидтардың түзілуін бөгейтін гормональдық емес пероральдік дәрілер де сынақтан өтуде. Сарапшылардың пікірінше, ерлерге арналған жаңа контрацептивтердің пайда болуы гормональдық құралдарды үнемі қолданатын әйелдерге түсетін қаржылық және физиологиялық жүктемені азайтуға мүмкіндік береді.

Мәтіннен қате тапсаңыз, бізге жазыңыз