Он минуттық жеңіл-желпі жүгіру көңіл күй мен ми жұмысын жақсартады

Қысқа әрі баяу жүгіру адамның зейінін шоғырландырып, көңіл күйін көтереді, деп жазды Medical News Today-ге сілтеме жасаған KAZ.NUR.KZ.

Ғалымдар тіпті ең аз физикалық жүктеменің өзі адамның психикалық денсаулығы мен когнитивтік функцияларына оң әсер ететінін анықтады. Жаңа зерттеуге сәйкес, жеңіл-желпі асықпай жүгірудің небәрі он минуты мидың атқарушылық функцияларын ынталандыруға және эмоционалдық фонды жақсартуға жеткілікті.

Ғылыми тәжірибеге 24 дені сау жас ерікті қатысты. Қатысушылар екі түрлі сынақтан өтті: бірінші жағдайда олар он минут бойы демалды, ал екіншісінде жүгіру жолында сағатына 3-тен 6 шақырымға дейінгі жылдамдықпен жүгірді. Әр кезеңге дейін және одан кейін зерттеушілер олардың когнитивтік қабілеттерін арнайы Струп түстік тесті арқылы бағалады, сондай-ақ ми қыртысындағы қанның оттегімен қанығу деңгейін өлшеді.

Нәтижелер жеңіл физикалық белсенділіктен кейін қатысушыларда реакцияның жылдамдауы, өзін-өзі бақылаудың және жалпы көңіл күйдің жақсарғаны тіркелгенін көрсетті. МРТ-сканерлеу эмоцияларды реттеуге, ойлауға және шешім қабылдауға жауап беретін ми аймағы – сол жақ префронтальдық қыртысқа оттегімен байытылған қан ағынының күшейгенін анықтады. Мамандар тіндердің оттегімен қанығуынан бөлек, жүгіру кезіндегі бастың табиғи қозғалыстары жүйке жасушаларын белсендіріп, оң рөл атқарады деп болжайды.

Мәтіннен қате тапсаңыз, бізге жазыңыз