Ғалымдар алғаш рет адам ағзасынан қозғалу қабілетін сақтап қалған функционалдық генді тапты

BC200 гені нейрондардағы белсенді жұмысын секіргіш геннің қозғалғыштығымен ұштастырады, деп жазды ScienceDaily-ге басылымына сілтеме жасаған KAZ.NUR.KZ.

Корнелл университетінің зерттеушілері поксвирус (контагиозды моллюск вирусы, MCV) ішінен табылған адамның генетикалық элементін зерттеу барысында осындай жаңалық ашты. Талдау нәтижесі BC200 деп аталатын элементтің ми жұмысында маңызды биологиялық рөл атқарып қана қоймай, сонымен қатар геномның жаңа учаскелеріне ауысып, еніп кете алатын "секіргіш ген" – транспозонның қасиеттерін сақтап қалғанын көрсетті. Зерттеу нәтижелері Science журналында жарияланды.

BC200 негізінен нейрондарда экспрессияланады және матрицалық РНК-ның ақуыздарға трансляциясын реттеуге көмектеседі. Ген миллиондаған жыл бұрын мобильді элементтен пайда болған. Әдетте эволюция процесінде транспозондар не қозғалу қабілетін жоғалтып, пайдалы гендерге айналады, не инактивацияланады. BC200 жағдайында эволюция екі функцияны да сақтап қалған. Зерттеудің жетекші авторы Седрик Фешотт ғалымдардың адам ағзасынан мұндай үйлесімділікті алғаш рет тіркегенін атап өтті.

BC200 жыныс жасушаларында да аз мөлшерде кездеседі, бұл оған геномның жаңа кірістірулерін келесі ұрпаққа беруге мүмкіндік береді. Ғалымдарды геннің аурулармен байланысы да қызықтырып отыр: BC200 Альцгеймер ауруы және ісіктің кейбір түрлері, соның ішінде сүт безі қатерлі ісігі кезінде аномальды түрде экспрессияланады. Корнелл университетінің командасы контагиозды моллюск вирусының BC200-ді өз мақсатында пайдалану мүмкіндігін және геннің орын ауыстыруы қатерлі ісік жасушаларында мутация тудыратын-тудырмайтынын анықтауды жоспарлап отыр.

Мәтіннен қате тапсаңыз, бізге жазыңыз