Таңғы ас, спорт пен сапалы ұйқы стресспен күресуге көмектеседі

Тұрақты түрде таңғы ас ішу, дене шынықтырумен айналысу, сапалы ұйқы мен балық майын қабылдау адамға стресспен жақсырақ күресуге және өмірлік қиындықтарға бейімделуге көмектеседі, деп жазды ScienceDaily-ге сілтеме жасаған KAZ.NUR.KZ.

Бингемтон университетінің ғалымдары күнделікті әдеттер мен психологиялық икемділік арасындағы байланысты анықтау үшін 400-ге жуық студент қатысқан зерттеу жүргізді.

Бұл параметр адамның жағымсыз эмоциялардан арылу және күрделі жағдайларда тез шешім табу қабілетін анықтайды. Толыққанды ұйқы мен ұзақтығы 20 минуттан асатын жаттығулардың жоғары деңгейдегі бейімделумен тікелей байланысы бар екені анықталды.

Таңғы асты үнемі ішпейтін, ұйқысы қанбайтын және тамақтануы дұрыс емес қатысушылар стресске төзімділіктің төмен көрсеткіштерін көрсетті. Зерттеу авторлары пайдалы әдеттер тек физикалық жағдайды жақсартып қана қоймай, сонымен қатар эмоционалдық жүктемелерге төзе алатын икемді ақыл-ойды қалыптастыратынын атап өтті.

Зерттеушілердің айтуынша, мұндай тәсіл мәселеге сырт көзбен қарауға және мазасыздықпен тиімдірек күресуге көмектеседі. Зерттеу нәтижелері Journal of American College Health ғылыми журналында жарияланды.

Мәтіннен қате тапсаңыз, бізге жазыңыз