Сыра, шарап, күшті алкоголь: зерттеушілер сусындардың өлім-жітімге қалай әсер ететінін анықтады

Ғалымдар 340 000-нан астам ересек адамның деректерін талдап, алкогольдік сусынды таңдау мен тамақ ішу кезінде ішу әдеті өлім қаупімен қалай байланысты екенін анықтады, деп жазды News Medical-ға сілтем жасаған KAZ.NUR.KZ.

Nutrition Journal ғылыми басылымында әр түрлі алкогольдік сусындарды тұтыну мен өлім-жітім арасындағы байланысты бағалайтын ғалымдардың ұзақ мерзімді когорттық зерттеуінің нәтижелері жарияланды. Талдауға авторлар орташа жасы 56 шамасындағы 340 924 қатысушыны қамтыған Британиялық биобанктің (UK Biobank) деректер базасын пайдаланды. Талдауға онкологиялық немесе жүрек-қан тамырлары диагнозы қойылғандар, сондай-ақ бұрын ішуді қойғандардың деректері енбеді. Еріктілердің денсаулық жағдайын бақылау орта есеппен 13,4 жылға созылды, бұл кезеңде 22 381 өлім-жітім тіркелді.

Талдау таза алкогольдің жалпы көлемі мен барлық себептен, соның ішінде жүрек-қан тамырлары патологиялары мен рактан болатын жоғары өлім-жітім арасындағы тікелей сызықтық байланысты көрсетті. Бұл ретте өлім-жітімнің өсуінің негізгі факторлары қатарынан күшті спирттік сусындар, сондай-ақ сыра мен сидр табылды. Тіпті сыра мен күшті алкогольді тұтынудың төмен деңгейі онкологиялық аурулардың жоғары қаупімен статистикалық тұрғыдан байланысты болып шықты.

Сонымен қатар шарапты орташа немесе төмен мөлшерде тұтынатын адамдар арасында жалпы қауіп көрсеткіштері төмен J тәрізді өлім-жітім қисығы байқалды, алайда шарапты шамадан тыс тұтыну да қатерлі ісіктің туындау ықтималдығын арттырды. Мұнда контекст те маңызды рөл атқарды: ас ішу кезінде сусындарды тұтыну ашқарынға ішумен салыстырғанда онша айқын емес негативтік корреляцияны көрсетті. Авторлар жұмыстың бақылау сипатында екенін атап өтті және алынған деректер шараптың қорғаныш қасиеттерін дәлелдемейтінін жеткізді.

Мәтіннен қате тапсаңыз, бізге жазыңыз