Америкалық ғалымдар ересектердің қан қысымына аптап қалай әсер ететінін анықтады

JAMA Network Open журналында жарияланған зерттеу нәтижесі бойынша, медициналық орталықтарға жүгінген пациенттерде ыстық ауа райы кезінде систолалық және диастолалық қысымның аздап төмендегені байқалған, деп хабарлады News-Medical басылымына сілтеме жасаған KAZ.NUR.KZ.

Америкалық зерттеушілер тобы амбулаториялық емханаларға келуші ересек пациенттердің қан қысымының өзгеруі мен қысқа мерзімді аптап ыстықтың әсері арасындағы байланысты зерттеді. JAMA Network Open журналында жарияланған зерттеудің нәтижелері 2019-2023 жылдар аралығындағы жаз айларында АҚШ-тың 40 штатындағы 2554 қоғамдық денсаулық сақтау ұйымына жасалған 4 221 866 өтінішті талдау негізінде шығарылып отыр. Деректер OCHIN электронды ұлттық желісінен алынды, ал аптап көрсеткіштері GridEX климаттық базасы арқылы есептелді.

Талдау көрсеткендей, аптап күндері пациенттердің систолалық қысымы орта есеппен 0,7 миллиметр сынап бағанасына, ал диастолалық қысымы 0,3 миллиметр сынап бағанасына төмендеген. Ең айқын өзгерістер 65 жас және одан жоғары егде жастағы адамдарда байқалды: бұл топта систолалық қысым 1,1 мм с.б., ал диастолалық қысым 0,8 мм с.б. төмендеген. Гипертония диагнозы қойылған және дәрі-дәрмек қабылдап жүрген пациенттерде систолалық қысым орта есеппен 1,0 мм с.б. төмендеген.

Ғалымдар ыстықта қан қысымының төмендеуінің физиологиялық себебі тамырлардың кеңеюі мен қан ағымының теріге қарай қайта бөлінуі екенін атап өтті. Анықталған ауытқулар жекелей алғанда клиникалық тұрғыдан елеулі қауіп төндірмесе де, ағзаның нақты жағдайдағы реакциясы зертханалық сынақтардан өзгеше болады. Авторлар қан қысымының өзгеруі аптап кезіндегі жүрек-қан тамырлары қаупінің басты факторы емес екенін түйіндеп, биомаркерлерді одан әрі зерттеу қажеттігін алға тартты.

Мәтіннен қате тапсаңыз,бізге жазыңыз