Ғалымдар: Тәтті сусындар асқазан обырының даму қаупін арттырады

Америкалық ғалымдар тәтті сусындарды жүйелі түрде тұтыну асқазан обырының қаупін арттыратынын, ал диеталық баламалары бұл тұрғыда қауіпсіз екенін анықтады, деп жазды News Medical басылымына сілтеме жасаған KAZ.NUR.KZ.

АҚШ ғалымдары Gastro Hep Advances журналында жарияланған ауқымды когорталық зерттеу жүргізіп, тәтті және диеталық сусындарды тұтыну мен асқазан обырының арасындағы байланысты бағалады. Мамандар екі ірі зерттеу жобасының: Медбикелер денсаулығын зерттеу (NHS) және Денсаулық сақтау мамандарын бақылау зерттеуінің (HPFS) 112 284 қатысушысының деректерін талдады. Бақылау кезеңінде еріктілер арасында асқазан аденокарциномасының 278 жағдайы тіркелді.

Нәтижелер көрсеткендей, күніне бір порциядан (шамамен 240 мл) артық тәтті сусын ішкен адамдарда асқазан обырына шалдығу қаупі оларды айына бір реттен сирек ішетіндерге қарағанда жоғары болған. Зерттеушілер бұл санатқа құрамында қант бар газдалған сусындарды, пунштерді, лимонадтар мен спорттық сусындарды жатқызды. Аурушаңдықтың жоғарылауы екі тәуелсіз зерттеуде де тұтынудың ең жоғары санатында байқалды. Сондай-ақ фруктозаны жалпы тұтынудың осы онкологиялық аурудың туындау жиілігімен оң корреляцияда екені анықталды.

Сонымен қатар жасанды тәттілендіргіштері бар калориясы төмен сусындардың асқазан обырының даму қаупін арттырумен ешқандай байланысы жоқ екені белгілі болды. Helicobacter pylori бактериясы туралы деректері бар қатысушылардың ішкі тобында ғалымдар оның болуы мен газдалған сусындарды тұтыну арасында байланыс таппады. Авторлар нақты биологиялық механизмдерді анықтау үшін одан әрі зерттеулер жүргізу қажеттігін атап өтті.

Мәтіннен қате тапсаңыз,бізге жазыңыз