Қытай ғалымдары кене арқылы жұғып, белгісіз ауру тудыратын жаңа вирусты анықтады

ScienceDaily басылымының жазуынша, зерттеушілер эндемиялық аймақтарда кене шаққан пациенттердің 10,4%-ынан бұған дейін белгісіз болып келген ортонаировирусты тапқан, деп хабарлады KAZ.NUR.KZ.

Бейжіңдегі Патогендер және биоқауіпсіздік мемлекеттік зертханасының ғалымдары тұмауға ұқсас белгілер мен ішкі ағзалардың зақымдануын тудыратын жаңа кене вирусын анықтады. Nairoviridae тұқымдасына жататын жаңа патоген Asian longhorned tick nairovirus (ALTNV) деп аталды. Зерттеу нәтижелері New England Journal of Medicine ғылыми журналында жарияланды.

Бұл жаңалық Даби вирусына (DBV) ұқсас белгілері бар, бірақ бұл ауыр қызба түріне тесті теріс нәтиже көрсеткен пациенттердің 30%-ындағы сырқаттану себептерін іздеу барысында ашылды. Зерттеушілер кене шаққан 3 163 пациенттің үлгілеріне талдау жасады. Нәтижесінде олардың 10,4%-ы ALTNV вирусын жұқтырғаны, ал DBV-ге тесті теріс шыққан адамдар арасында жаңа вируспен ауырғандар үлесі 15,1%-ды құрағаны анықталды. ALTNV инфекциясының негізгі белгілері ретінде шаршағыштық (84%), асқазан-ішек жолдарының бұзылуы (80%), тромбоцитопения (38%) және аминотрансфераза деңгейінің жоғарылауы (36%) тіркелді. Моноинфекция жұқтырған барлық пациент сауығып кетті.

38 адамда тіркелген ALTNV және DBV вирустарын бір мезгілде жұқтыру ерекше қауіп төндіреді. Коинфекция кезінде науқастардың 61%-ында респираторлық белгілер, ал 84%-ында бүйрек жұмысының бұзылуы байқалды, бұл ретте аталған топтағы өлім-жітім көрсеткіші 18,4%-ды құрады. Қытайдың 15 провинциясынан жиналған 47 428 кенеге жүргізілген тестілеу нәтижесінде даралардың 1,3%-ынан ALTNV РНҚ-сы анықталды. Вирус көбінесе сүтқоректілерге патогенді жұқтыра алатын азиялық Haemaphysalis longicornis кенесінде (1,8%) кездескен.

Мәтіннен қате тапсаңыз, бізге жазыңыз