Бүйрек обырына қарсы дербестендірілген вакцина алғашқы клиникалық сынақтан сәтті өтті

ScienceAlert басылымының жазуынша, бүйрек обырына шалдыққан тоғыз науқасқа жеке дара вакцина егілді: олардың барлығында иммундық жауап қалыптасып, ауру қайталанбаған, деп хабарлады KAZ.NUR.KZ.

Халықаралық зерттеушілер тобы бүйректің ашық жасушалы обырына шалдыққан науқастарға арналған дербестендірілген вакцина әзірледі. Бірінші кезеңдегі клиникалық сынақтың нәтижелері беделді Nature ғылыми журналында жарияланды.

Зерттеуге ісікті алып тастау бойынша ота жасалған, аурудың үшінші және төртінші сатысындағы тоғыз адам қатысты. Мамандар әр науқас үшін алынған ісік тініндегі ақуыз фрагменттері – неоантигендер негізінде бірегей препарат жасап шығарды. Қатысушылардың бесеуі қосымша ипилимумаб иммунотерапиялық препаратын қабылдады.

Орташа есеппен үш жыл төрт айға созылған бақылау кезеңінде қатысушылардың ешқайсысында ауру қайталанбады. Тоғыз науқастың барлығында тұрақты иммундық жауап қалыптасты, ал жеті адамда Т-жасушалары өз ісігінің жасушаларын сәтті таныды.

Препарат қауіпсіздіктің жоғары деңгейін көрсетті: ең жиі кездесетін жанама әсерлер инъекция орнындағы реакциялар мен тұмаудың қысқа мерзімді белгілері болды. Ауыр жағымсыз әсерлер тіркелмеді.

Йель университетінен Дэвид Браун және Дана-Фарбер обыр институтынан Тони Шуэри бастаған зерттеу авторлары алдағы уақытта қосымша зерттеулер жүргізу қажеттігін атап өтті. Олардың айтуынша, зерттеуге қатысушылар санының аздығы және бақылау тобының болмауы аурудың қайталанбауына тек вакцинация себеп болды деп сеніммен айтуға әзірге мүмкіндік бермей отыр.

Мәтіннен қате тапсаңыз, бізге жазыңыз