D дәруменінің аналогы ұйқы безі обырының терапияға төзімділігін жеңуге көмектесті

Ғалымдар парикальцитол препараты ісіктің микроортасын қайта құрып, химиотерапияның тиімділігін арттыратынын анықтады, деп жазды ScienceDaily-ге сілтеме жасаған KAZ.NUR.KZ.

Дана-Фарбер атындағы обыр институты мен Солк институтының зерттеушілері метастаздық ұйқы безі обырын емдеудің жаңа әдісіне рандомизацияланған клиникалық зерттеу жүргізді. Ғалымдар жұмысының нәтижелері Nature Cancer ғылыми журналында жарияланды.

Сынаққа бұрын емделмеген метастаздық ұйқы безі обыры бар 36 пациент қатысты. Еріктілер стандартты химиотерапиядан бөлек, плацебоны, бүйрек ауруларын емдеуге FDA мақұлдаған D дәруменінің аналогы – парикальцитолды көктамыр ішіне немесе ішке қабылдау арқылы алды. Жұмыс авторлары – Брайан Волпин, Кимберли Перес және іргелі жаңалықтың тең авторы Рональд Эванс.

Биопсияны талдау парикальцитолдың ісіктің айналасында тығыз қорғаныс тосқауылын қалыптастыратын фибробласттардың белсенділігін төмендететінін және иммундық жүйенің T-жасушаларының енуін арттыратынын көрсетті. Парикальцитол алған 24 пациенттің ішінде 10 адамда емге ішінара жауап тіркелді, ал плацебо тобындағы 12 науқастың тек біреуінде ғана нәтиже болды. D дәруменінің аналогы бар топтағы бес адам аурудың өршуінсіз бір жыл өмір сүрді. Ең жоғары өміршеңдік ісіктегі D дәрумені рецепторларының деңгейі жоғары пациенттерде байқалды.

Маңызды: Бұл материал тек танымдық сипатқа ие және дәрігерлік кеңес немесе медициналық тағайындау саналмайды. Бұл деректерді өз бетінше диагноз қою немесе емделу үшін пайдаланбаңыз. Денсаулыққа қатысты кез келген симптомдар мен сұрақтар бойынша міндетті түрде білікті дәрігермен кеңесіңіз.

Мәтіннен қате тапсаңыз, бізге жазыңыз