MIT ғалымдарының зерттеуі: Кето-диета аш ішек обырының даму қаупін арттырады

Мамандар рациондағы майдың жоғары концентрациясы діңгекті жасушалардың бөлінуін ынталандыратынын анықтады, деп жазды ScienceDaily-ге сілтеме жасаған KAZ.NUR.KZ.

Массачусетс технологиялық институтының (MIT) ғалымдары кетогендік диетаның асқазан-ішек жолдары мүшелеріне әсерін зерттеді. Май мөлшері жоғары және көмірсуы аз рационның ағзаға әсері туралы ғылыми жұмыстың нәтижелері Nature журналында жарияланды. Жобаның аға авторы – MIT-тің діңгекті жасушалар жөніндегі бастамасының директоры Омер Йылмаз, ал жетекші авторлары – зерттеушілер Джессика Шей мен Фандао Чи.

Онкологияға генетикалық бейімділігі бар тышқандарға жүргізілген эксперименттер барысында кетогендік диетаның бақылау тобымен салыстырғанда аш ішекте ісіктің жиі түзілуіне себеп болатыны анықталды. Бұл ретте май қышқылдарының ыдырау процесі ішектегі діңгекті жасушалардың тезірек бөлінуіне мәжбүр ететін PPAR тұқымдас ақуыздарды белсендіреді. Жоғары белсенділік шырышты қабықтың жарақаттан кейін тезірек қалпына келуіне көмектеседі, бірақ сонымен бірге онкологиялық процестің даму қаупін арттырады.

Сонымен қатар тоқ ішекті тексеру кезінде ғалымдар кері әсерді тіркеді: кетогендік диета ісіктің өсуін тежеген. Жұмыс авторлары рационның қорғаныш және жағымсыз қасиеттері кетон денелерімен емес, дәл май метаболизмімен байланысты екенін атап өтті. Осы себепті кетоны бар коммерциялық қоспалар мұндай әсерді қайталамайды. Авторлар ішектің көршілес бөлімдерінің әр түрлі реакциясының себептерін түсіну үшін зерттеуді жалғастыруды жоспарлап отыр.

Мәтіннен қате тапсаңыз, бізге жазыңыз