Алматыда жедел ішек инфекциясы белгілерімен ауруханаға түскен оқушылардың жағдайы белгілі болды

Алматы қалалық қоғамдық денсаулық сақтау басқармасы ауруханаға жатқызылған оқушыларға қатысты түсінік беріп, олардың жағдайы туралы мәліметті бөлісті, деп хабарлайды КAZ.NUR.KZ.

Бұған дейін Алматыдағы Республикалық физика-математика мектебінің ондаған оқушысы жедел ішек инфекциясы белгілерімен ауруханаға түскенін жазған едік. Одан кейін мектепте тексеру жұмыстары басталды.

Алматы қалалық қоғамдық денсаулық сақтау басқармасының баспасөз қызметі KAZ.NUR.KZ тілшісіне жаңа мәлімет бойынша 12-14 қазан аралығында қалалық жұқпалы аурулар ауруханасына 48 оқушы жатқызылғанын, тағы 6 бала интернатта оқшауланып, медициналық бақылауда екенін хабарлады.

"Қазіргі уақытта ауруханаға жатқызылған балалардың жағдайы тұрақты. Реанимациялық шараларды қажет ететін жағдайлар жоқ", - деп нақтылады басқармадағылар.

Сондай-ақ барлық балаға қажетті медициналық көмек толық көлемде көрсетіліп жатқаны атап өтілді. Оларды емдеу үшін қажетті жағдай жасалған, пациенттер медицина мамандарының тұрақты бақылауында.

Мәтіннен қате тапсаңыз, бізге жазыңыз