Ғалымдар көзі көрмейтін науқастардың көру қабілетін ішінара қалпына келтірді

Ғалымдар гендік терапия мен арнайы көзілдіріктің көмегімен көзі көрмейтін адамдардың көру қабілетін ішінара қалпына келтірді. Бұл туралы SciTechDaily-ге сілтеме жасаған KAZ.NUR.KZ хабарлайды.

Халықаралық клиникалық зерттеуге пигменттік ретиниттің ауыр түріне шалдыққан он адам қатысты.

Бұл тұқым қуалайтын ауру кезінде жарықты қабылдауға жауап беретін торқабық жасушалары – фоторецепторлар жойылады. Осы мәселені шешу үшін зерттеушілер фоторецепторлар өлген кезде де сақталатын торқабықтың ганглионарлы жасушаларын пайдалануды ұйғарды.

Қатысушылардың көру қабілеті нашар көзіне бір реттік инъекция жасалып, кәріптас түсті жарыққа сезімтал ChrimsonR ақуызын өндіруге арналған генетикалық материал енгізілді.

Содан кейін науқастар қоршаған ортадағы өзгерістерді тіркеп, оларды кәріптас түсті жарық импульстеріне айналдыратын камерасы бар арнайы көзілдірік киді. Бұл жарқылдар модификацияланған жасушаларды белсендіріп, осылайша миға сигнал беруге мүмкіндік ашты.

Емдеудің арқасында он қатысушының жетеуі жарыққа сезімтал бола бастады, ал алтауы клиникалық тұрғыдан маңызды жақсаруға қол жеткізді. Төрт науқас заттарды табуға және олардың орналасқан жерін анықтауға, сондай-ақ кеңістікте бағдарлануға, мәселен, есікті табуға қабілетті болды.

Бұл әдіс көру қабілетін толығымен қалпына келтіруге мүмкіндік бермейді, алайда зерттеулер технологияның қауіпсіздігін растап, тиімдірек әдістемелерді әзірлеуге жол ашты.

Мәтіннен қате тапсаңыз, бізге жазыңыз