РФММ-дегі жаппай улану дерегі: тексеріс нәтижесінде ішек таяқшасы мен стафилококк анықталды

Алматы қаласы санитариялық-эпидемиологиялық бақылау департаментінің қызметкерлері жақында РФММ-де болған оқиғаны тергеуге қатысты тың мәліметтерді жариялады, деп хабарлайды KAZ.NUR.KZ.

Департамент өкілдері Алматы қаласындағы Республикалық физика-математикалық мектебінде болған жаппай улану дерегін тексеру барысы туралы NUR.KZ тілшісінің сауалына жауап берді.

"Санитариялық-эпидемиологиялық қызмет мамандары тексеріс жүргізіп жатыр. Ауырған оқушылар мен асхана блогының 38 қызметкері тексерілді, дайын тағамның, шикі өнімнің, ауыз судың сынамалары, беттер мен ыдыстардан шайындылар, сондай-ақ дезинфекциялау құралдарынан сынамалар алынды. Байланыста болған адамдарға медициналық бақылау орнатылды", - деді ведомстводағылар.

Асхана блогында санитариялық талаптардың бұзылғаны анықталды: мәзірдің сәйкес емес екені, өнімдерді сақтау және тәуліктік сынамалар ережелерінің бұзылуы, қажетті құжаттама мен құрал-жабдық таңбасының жоқтығы. Сондай-ақ оқушыларға медициналық бақылау ұйымдастыруда кемшіліктер анықталды.

"Зертханалық зерттеу үшін дайын тағамның 7 сынамасы, дайын өнімнің 2 сынамасы, шикі өнімнің 3 сынамасы, беттер мен ыдыстардан 30 шайынды, судың 5 сынамасы, дезинфекциялау құралдарының 2 сынамасы алынды. Сондай-ақ тамақ блогының 38 қызметкері патогенді стафилококк пен ішек инфекциялары қоздырғыштарының тасымалдау бойынша тексерілді", - деп хабарлады СЭБД.

Зерттеу нәтижелері бойынша жекелеген дайын тағамдардың микробпен ластанғаны, тағам сынамалары мен ыдыс шайындыларынан ішек таяқшасы тобының бактериялары, сондай-ақ дезинфекциялау құралы жұмыс ерітіндісінің нормативтік талаптарға сай келмейтіні анықталды.

Зертханалық зерттеу нәтижелері бойынша асхана блогының төрт қызметкерінен Staphylococcus aureus анықталды", - деді СЭБД өкілі.

Сол адамдарға қатысты бас мемлекеттік санитариялық дәрігердің тиісті қаулылары негізінде жұмыстан уақытша шеттету шаралары қабылданды.

Мамандар сондай-ақ барлық ауырған баланың инкубациялық кезеңде интернат-мектептің асханасында тамақтанғанын хабарлады. Көбі аурудың тауық рулеті мен бешбармақ жеумен байланысты екенін көрсетті.

Тексеру нәтижелері бойынша мамандар әкімшілік құқықбұзушылық туралы екі хаттама жасады.

Оқушыларға тамақ әзірлеу үшін ЖШС жалға алатын РФММ асханасының қызметі 13 қазандағы тиісті қаулыға сәйкес 60 күнге тоқтатылды.

"РФММ асхана блогының қызметі санитариялық-эпидемиологиялық талаптардың анықталған бұзушылықтары жойылса және заңнамада көзделген кезектен тыс тексеру нәтижелері бойынша бұл фактіні уәкілетті орган растаса қайта жандану мүмкін", - деп нақтылады СЭБД.

Контекст

Бұған дейін Алматыдағы Республикалық физика-математикалық мектебінің ондаған оқушысы жіті ішек инфекциясы белгілерімен ауруханаға түскенін жазған едік. Содан кейін мектепте тексерулер басталды.

15 қазанда Алматы РФММ филиалының ауруханаға жатқызылған оқушыларының саны 55-ке жеткені белгілі болды.

Сондай-ақ Денсаулық сақтау министрлігі мектептен қандай бұзушылықтар анықталғанын атап, шаралар қабылданғаны туралы мәлімдеді. Оқу орнының өзі оқушылардың қашықтан оқыту форматына уақытша көшірілетінін хабарлады.

Кейін полиция бұл факті бойынша қылмыстық іс қозғалғанын мәлімдеді. Өткен аптада РФММ-нің емделіп жатқан барлық оқушысы Алматыдағы ауруханадан шығарылды.

Мәтіннен қате тапсаңыз, бізге жазыңыз