"Салмағы 7 келіден асады": Өзбекстанда көктемнің алғашқы күнінде алып қыз бала дүниеге келді

Ташкент облысының Янгиюль қаласындағы ауданаралық перинаталдық орталықта салмағы 7 келіден асатын қыз бала дүниеге келді. Бұл туралы KAZ.NUR.KZ Өзбекстанның Денсаулық сақтау министрлігіне сілтеме жасап хабарлайды.

Министрліктің мәліметінше, нәрестенің салмағы – 7 келі 3 грамм.

Қазіргі уақытта оның жағдайы қанағаттанарлық деп бағаланып отыр. Анасы мен қызы дәрігерлердің бақылауында.

Анасы сәбиін кесарь тілігі арқылы дүниеге әкелген. Нәресте отбасындағы – төртінші бала.

Министрлік өкілдері былтыр қараша айында да Өзбекстанда салмағы жеті келіге жуықтайтын алып сәбидің дүниеге келгенін атап өтті. Ол кезде салмағы 6 келі 865 грамм болатын ұл бала Ташкент облысының Нурафшан қаласында туған.

Айта кетейік, салмағы 5, 6 келіден асатын алып сәбилердің дүниеге келуі біздің елімізде де тіркеліп жатады. Мысалы, былтыр Шымкентте қазан айында салмағы 6,5 келі болатын ұл бала дүниеге келген еді.