Алматыда қала күні қарсаңында үшем дүниеге келді

Алматыда қала күні қарсаңында үшем дүниеге келді. Сондай-ақ қала күні 69 сәби дүни есігін ашқан, деп хабарлайды қала әкімдігінің баспасөз қызметіне сілтеме жасаған KAZ.NUR.KZ.

Ведомствоның мәліметінше, Алматыда биыл қала күні ерекше тойланған.

Түрлі іс-шаралар мен мерекелік көңіл күйге қоса, 21 қыркүйекте Алматы перзентханаларында 69 сәби дүниеге келген, оның 32-сі ұл және 37-сі қыз бала.

Қалалық денсаулық сақтау басқармасы өкілдерінің хабарлауынша, өмірге келген барлық нәресте мен олардың аналарының жағдайы жақсы.

Ал мереке қарсаңында Қалалық перинаталдық орталықта сирек әрі ғажайып оқиға болған. Бұл жерде үшем (бір ұл, екі қыз бала) дүниеге келген.

Дәрігерлер үшемнің анасын 32-аптада шұғыл түрде босандыру туралы шешім қабылдаған.

Таңғы төрт шамасында перинаталдық орталықтың білікті мамандары тез арада жұмылып, ота сәтті өткен.

Кесарь тілігі арқылы дүниеге келген сәттен бастап нәрестелерге жедел көмек көрсетіліп, жансақтаудан соң патология бөліміне ауыстырылған.

Мәтіннен қате тапсаңыз, бізге жазыңыз