Жаңа Конституция күшіне енген күні Қазақстанда қанша сәби дүниеге келді
Жарияланған күні:
Денсаулық сақтау министрлігі 1 шілдеде, Қазақстан Республикасының жаңа Конституциясы күшіне енген күні елде 857 сәби дүниеге келгенін мәлім етті. Бұл туралы ведомствоның баспасөз қызметіне сілтеме жасаған KAZ.NUR.KZ хабарлайды.
"Өңірлік денсаулық сақтау басқармаларының мәліметінше, дүниеге келген нәрестелердің 435-і – ұл, 422-сі – қыз бала. Сонымен қатар Атырау және Алматы облыстарында егіздер дүниеге келді.
Әрбір жаңа өмір – елдің жарқын болашағына бастар маңызды қадам. Жаңа Конституция күшіне енген тарихи күні 857 кішкентай қазақстандықтың өмірге келуі – мемлекеттің конституциялық дамуының жаңа кезеңімен үндескен айрықша оқиға", - делінген хабарламада.
Естеріңізге сала кетейік, кеше, 1 шілдеде биылғы 15 наурызда өткен республикалық референдумда қабылданған Қазақстан Республикасының жаңа Конституциясы күшіне енді.
Сондай-ақ президент Қасым-Жомарт Тоқаев Құрылтай сайлауы өтетін күнді белгіледі. Депутаттарды сайлау 23 тамызда өтеді.
Мәтіннен қате тапсаңыз, бізге жазыңыз
Оригинал статьи: https://kaz.nur.kz/society/2395504-zhanga-konstitutsiia-kushine-engen-kuni-qazaqstanda-qansha-sabi-duniege-keldi/
