Ғалымдар: Ата-ана бақылауының жеткіліксіздігі балалардың мінез-құлқындағы қиындықтарға байланысты

News Medical басылымының жазуынша, АҚШ-тағы 2700 отбасы қатысқан зерттеу нәтижелері тәрбие әдістерінің жиынтығы балалардағы мазасыздық пен агрессияға қалай әсер ететінін көрсетті, деп хабарлады KAZ.NUR.KZ.

Нью-Йорк штаты Кортленд университетінің психология доценті Сяое Сюй бастаған зерттеушілер тобы ата-ана тәрбиесінің балалардың эмоционалдық жағдайы мен мінез-құлқына әсерін зерттеп, PLOS One журналында нәтижелерін жариялады. Зерттеуде АҚШ Ұлттық денсаулық сақтау институттарының (NIH) "Балалар денсаулығы нәтижелеріне экологиялық әсер ету" (ECHO) бағдарламасының 5 пен 18 жас аралығындағы 2700-ден астам бала мен жасөспірімді қамтитын деректері пайдаланылды.

Жұмыс авторлары тәрбиенің үш негізгі профилін анықтады: жақсы бақылаумен ұштасқан жоғары деңгейдегі позитивтік тәрбие, орташа бақылаумен ұштасқан төмен деңгейдегі позитивтік тәрбие және төмен бақылаумен ұштасқан орташа деңгейдегі позитивтік тәрбие. Талдау көрсеткендей, эмоционалдық қолдау мен тиісті бақылауды ұштастырған ата-аналардың балаларында экстернализацияланған (агрессия, зейін қою мәселелері) және интернализацияланған (мазасыздық, тұйықтық, депрессия) проблемалар деңгейі ең төмен болған. Мінез-құлықтағы ең үлкен қиындықтар бақылау деңгейі төмен топта байқалды.

Жалпы профильдерден бөлек, ғалымдар тәрбиенің жекелеген әдістерін де бағалады. Тұрақсыз тәртіптің экстернализацияланған және интернализацияланған бұзылулармен тікелей байланысты екені анықталды. Бақылаудың нашарлығы агрессия мен гиперактивтілікпен жеке корреляцияланғанымен, мазасыздық деңгейіне әсер етпеген. Авторлар жұмыстың шектеулі тұстарын атап өтті: сауалнаманы негізінен аналар толтырған (тек 52 әке қатысқан), ал деректер кесіндісі қатаң себеп-салдарлық байланыстарды орнатуға мүмкіндік бермейді.

Мәтіннен қате тапсаңыз, бізге жазыңыз