Ғалымдар: Жасөспірімдердің күнделікті жаяу жүруі ми құрылымы мен психикалық денсаулықты жақсартады

АҚШ-тағы бес мың бала қатысқан зерттеу нәтижелері жаяу жүрудің мазасыздық пен мінез-құлық проблемаларын азайтатынын көрсетті, деп жазды News Medical-ға сілтеме жасаған KAZ.NUR.KZ.

Лондон Корольдік колледжінің Психиатрия, психология және нейроғылымдар институтының ғалымдары Массачусетс университетімен (Амхерст) бірлесіп, жаяу жүрудің жасөспірімдердің психикасына оң әсер ететінін дәлелдеді. АҚШ-тың Adolescent Brain Cognitive Development (ABCD) зерттеуінің деректерін пайдаланған ауқымды жұмыстың нәтижелері ғылыми журналда жарияланды. Жобаға 11-12 жас аралығындағы Fitbit фитнес-трекерлерін таққан 5515 жасөспірім қатысты.

Бір жылдан кейін зерттеушілер қатысушылардың психикалық денсаулығын Child Behavior Checklist сауалнамасы арқылы бағалады. Жасөспірімдер неғұрлым көп қадам жасаса, оларда мазасыздық, депрессия және мінез-құлық мәселелерінің белгілері соғұрлым аз байқалатыны анықталды. Күніне 5000 қадамнан аз жүретін балаларда шағымдар ең көп тіркелсе, ал 8000 және 12 000-нан астам қадам жасайтын қатысушыларда симптомдар айтарлықтай сирек кездескен. Сонымен қатар ең белсенді жасөспірімдердің миында қозғалыс пен эмоцияны реттеуге жауап беретін екі аймақта ми тінінің қалыңдауы байқалды. Жаяу жүру мен мектептегі үлгерім арасындағы байланыс анықталған жоқ.

Зерттеу авторлары, оның ішінде Дивьянгана Ракеш, Цинъян Ли және Аманда Палуч, күнделікті белсенділікті тіпті 1000-2000 қадамға арттырудың айтарлықтай пайда әкелетінін атап өтті. Зерттеу бақылау сипатында болғандықтан, ғалымдар тікелей себеп-салдарлық байланыстың бар екенін растамады, алайда жасөспірімдердің күнделікті белсенділігінің кез келген түрін, соның ішінде мектепке жаяу баруды қолдауға кеңес берді.

Мәтіннен қате тапсаңыз, бізге жазыңыз