25 жылдық тарихы бар шалшыққа ашылған желі парақшасы жұртты таңырқатты

Ресейдің Южно-Сахалинск қаласында 25 жыл бойы билік назарынан тыс қалған шалшықтың құрметіне Instagram желісінде парақша ашылып, көпшіліктің ерекше қызығушылығын тудырды.

Ресейдің Қиыр Шығыстағы Южно-Сахалинск қаласында үлкен шалшыққа айналған жолдардың біріне 25 жылдан астам уақыт бойы ешкім жөндеу жұмыстарын жүргізбеген. Бұл жайтқа көпшіліктің назарын аудару мақсатында жергілікті тұрғындар Instagram желісінде Ya_Luzha_u_doma атты парақшаны аталмыш шалшықтың құрметіне ашып береді.

Бүгінде шалшықтың желідегі парақшасына 16 мыңнан астам адам жазылған.

Парақшаның сипаттамасында айтылғандай, бұл шалшық Южно-Сахалинскінің Тихоокеанская көшесіндегі 10 үйдің жанында орналасқан.

Аккаунт авторының сөзіне сенсек, алғашқы күні "шалшықтың" парақшасына 6 адам ғана жазылған. Екінші күні жазылушылар саны 40-қа жетеді.

Мәскеу жол радиосы бұл парақша туралы өз хабарларының бірінде сөз еткеннен кейін жазылушылар саны күрт артып, екі мыңға жетіпті.

Сонымен, бұл шалшықтың ерекшелігі неде?

Қарапайым шалшыққа ерекше қызығушылық тудыруға ол жерде тұрып жатқан жандардың да әсері бар. Олар шалшықтың маңында түрлі суреттерге түсуде.

Парақша авторының айтуынша, ол биліктен 2017 жылы жолды шалшықтан тазартуды өтінген. Өтінішті қабылдап, тазартуға уәде берген биліктің ресми хаты да автордың қолында бар болып шықты.

Содан бері 4 жыл өтсе де шалшыққа шенділердің назары ауа қоймаған екен.