Үйсіз азамат шаштараздың көмегімен сымбатты ер адамға айналып шыға келді

Танымал француз шаштаразшысы Дэвид Кодат үйі жоқ азаматтың шашын тегін қиып берді. Ер адамның бір сәтте келбеті өзгеріп шыға келген деп жазады 4tololo.ru.

Дэвид Кодаттың клиенттері қатарында танымал футболшылардан бастап, әлемнің түрлі жұлдыздарына дейін бар.

Шаштаразшы үйі жоқ азаматтарға тегін шашын қиып беруінің арқасында көпшілік арасында ерекше танымалдыққа ие болған.

Ол мұндай жұмыстарының нәтижесін TikTok парақшасында жариялап, жұрттың мақтауларына ие болуда.

Дэвид бала кезінде кедейліктің дәмін татып үлгергенін, отбасымен талай қиындықтарды еңсеруге тура келгенін айтып, ағынан жарылды.

"Біз де үйсіз қалған едік. Мен сол кезді ешуақытта ұмытпаймын. Бұл естеліктер жағдайы төмен адамдарға мейіріммен қарауыма көмектеседі", - дейді ол.

Үйсіз жандардың жай-күйін жақсы түсінетін шаштаразшы, тіпті қайырымдылық қауымдастығының мүшесі атанған. Ол әр жексенбі сайын кедей жандарға тағам таратады.

"Бір күні мен оларға тегін шаш қиып беру арқылы көмектесе алатынымды түсіндім", - дейді ол.

Дэвид расымен де кәсібінің арқасында үйсіз азаматтарға айтарлықтай көмектесіп жүр. Олардың кейбірі шаштаразшының қызметінен кейін жақындарын тауып, отбасына оралып үлгерген.

Шаштаразшының кезекті тегін қызметіне ие болған үйі жоқ ер адам сымбатты азаматқа айналып шыға келді.

Ол ұйысқан шашы мен сақалынан арылғаннан кейін адам танымастай өзгерген.

Мәтіннен қате тапсаңыз, бізге жазыңыз