"Керуен-сарай": Ертегі әлеміне айналған Түркістанның бүгінгі келбеті қандай

10 сәуір күні Түркістан қаласында "Керуен-сарай" көпфункционалды туристік кешені ашылған болатын. Құрылысы 2019 жылы желтоқсанда басталған кешен әлі де жұмысына толық кіріскен жоқ. Дегенмен қазіргі күннің өзінде жекелеген нысандары қонақтарды күтуге әзір деп жазады Massaget.kz сайты.

"Керуен-сарай" кешенінің орналасқан жері - "Әзірет Сұлтан" мәдени қорығының буферлік аймағындағы 20,5 га аумақта, Қожа Ахмет Яссауи кесенесіне қарама-қарсы.

Кешенді араламас бұрын, Түркістан қаласының визит-орталығына кіріп қайтуға болады. Бұл жерде қаланың тарихымен, болашақта істелетін жұмыстарының жоспарымен таныса аласыз.

Мұнда қолөнер шеберлерінің туындылары мен көне жәдігерлер қойылған көрме де бар.

Ал Түркістанның кішірейтілген макетінен қаланың мәдени, тарихи нысандарын қарасаңыз, көп ғимараттың арасынан үлкен аумақты алып жатқан "Керуен-сарай" бірден көзге түседі.

Орталық Азияда баламасы жоқ кешен Қожа Ахмет Яссауи кесенесінен кейін өңірге туристер мен инвестиция тартатын басты орталыққа айналуы тиіс. Кешенде 4 мыңнан астам тұрақты жұмыс орны құрылған.

Кешенде құрылыс жұмысы әлі де аяқталмағанын байқауға болады. Соңғы детальдар түзелсе, бұл жер де құлпырып кеткелі тұр.

Кешенге кіргенде жұмыртқа салынған үлкен ұяны көре аласыз. Бұл қазақ мифологиясындағы қыран тәрізді алып құс – Самұрықтың ұясы.

Ғимарат "Алтын Самұрық" деп аталады. Ішінде ұшатын театр бар. Еліміздің өткені, бүгіні және келешегінің көрінісі осы театр-музейде көрсетіледі.

"Алтын Самұрықтың" жанында "Сиқырлы керуен" атты балаларға арналған ойын-сауық орталығы орналасқан. Сырты бір қарағанда өзге нысандардан ерекшеленбеуі мүмкін. Алайда ішіне кірсеңіз, шығыс ертегісіне түскендей күй кешесіз. 

Ескі мұнаралар, қала орталығындағы базар, қабырғаға ілінген шамдар сізді Аладдин мен Әли Бабаның әлеміне елітіп әкетеді.

Мұнда түрлі әткеншек қойылған. Балалар айналатын кесе мен тез жүретін пойызға отырамын, атқа мініп шабандоз боламын десе де өз еркі. Таңдау көп. Кешен жылына 300 мың қонақты күтуге қауқарлы екен.

"Керуен-сарайдағы" барлық нысандар су арнасы арқылы байланыстырылған. Түркістандықтар мен қала қонақтары бұл жерге "Қазақстанның Венециясы" деген өзге атау беріп те үлгерген.

Расымен, алғашында арнаны, ары-бері өткен қайықтарды көргенде Түркістан емес, өзге бір қалаға түскендей күй кешесіз.

Су кешеннің қақ ортасын кесіп өтетіндіктен, 50-60 метр сайын екі жағаны қосатын көпір салынған. Ол көпірлер әдемі фото түсіру үшін ойластырылғандай.

Арнаны жағалай жүре берсеңіз, "Керуен-сарайдың" негізгі нысаны саналатын қауызға жетесіз.

Қауыздың ортасына қираған кеме кейпіндегі субұрқақ орналастырылған. Мұнда кейінірек ораламыз.

Әзірге, мына ғимаратқа назар салыңыз. Бұл — амфитеатр.

Мұнда көпшілік үшін "Қыз қуу" деген қойылым болып жатты. Бұл арнайы үйретілген жылқылардың шоуы екен. Жылқыларды шоуға дайындаған Франциядан келген атақты атбегі Марио Лураши.

"Қыз қуудан" кейін қауызда сиқырлы қайықтардың ғажайып шеруі басталды.

Қойылым қазақтың ең көне мұраларының бірі, лиро-эпостық дастан — "Қыз Жібек" жырының негізінде жасалған. Әр қайық әр түрлі кейіпкерді бейнелейді және келушілерді қиялға толы әлемге әкетеді.

Төлеген.

Қыз Жібек.

Қойылым аяқталғаннан кейін жұрт әп-сәтте тарап кетті. Айнала тып-тыныш күйге енді. Әуезді ән қосылып, түн ортасы ауғанша сөнбеген шамдар "Керуен-сарайға" ерекше атмосфера сыйлап тұрды.