Бұлғын, Үнді жайрасы: ұлттық парк пен қорықта сирек кездесетін жануарлар фототұзаққа ілікті

"Сайрам-Өгем" ұлттық паркінде сирек кездесетін жануарлар фототұзаққа түсіп қалды. Сондай-ақ Батыс Алтай қорығында бұлғын таспаға іліккен, деп хабарлайды KAZ.NUR.KZ.

"Сайрам-Өгем" мемлекеттік ұлттық табиғи паркінің аумағында қойылған фототұзақтарға сирек кездесетін жабайы жануарлар – Түркістан сілеусіні, Үнді жайрасы, қасқыр және Сібір елігі түсіп қалған.

"Бұл кадрлар Қазақстанның оңтүстігінде мекендейтін жануарлар әлемінің алуан түрлілігін тағы бір мәрте дәлелдейді", - дейді ұлттық парк өкілдері.

Ұлттық парк қызметкерлерінің айтуынша, фототұзақтар тек жануарларды бейнежазбаға түсіріп қана қоймай, олардың қауіпсіздігін қамтамасыз етуге де көмектеседі. Қыс мезгілінде биотехникалық іс-шаралар күшейтіліп, жабайы аңдарға жем-шөп қоры дайындалды.

Ал бұлғынды (соболь – ред. ескертпесі) Батыс-Алтай қорығының мемлекеттік инспекторлары аумақты аралау кезінде видеоға түсіріп алған.

Бұлғын (лат. Martes zibellina) – сусарлар тұқымдасының сусарлар туысына жататын жыртқыш сүтқоректі аң.

Дене тұрқы 40-55 см, құйрығы – 20 см-дей, салмағы 0,4-1,6 кг. Қазақстанда Алтайдың қылқан жапырақты ормандарында кездеседі.

Ұсақ жәндіктермен, кеміргіштермен, тиінмен, қоянмен, балқарағай жаңғағымен, жидекпен қоректенеді. Шыршалы, балқарағайлы ормандардағы ағаш діңдері мен тас қуыстарды мекендейді.