Үстірт қорығында сирек кездесетін жыртқыш аң көзге түсті (видео)

Үстірт қорығының аумағында сирек кездесетін жыртқыш аң – итаю көзге түсті, деп хабарлайды қорықтың әлеуметтік желідегі парақшасына сілтеме жасаған KAZ.NUR.KZ.

4 ақпанда Үстірт мемлекеттік табиғи қорығының табиғи кешендер мен нысандарды қорғау бөлімінің мемлекеттік инспекторлары рейдтік іс-шара кезінде қорық аумағының Кендірлі аймағында сирек кездесетін, ҚР Қызыл кітабына енгізілген жыртқыш аң – итаюды байқап, видеоға түсіріп алған.

"Бұл – Үстірт қорығы аумағында сирек кездесетін түрлердің сақталуы мен олардың табиғи мекенінде тіршілігін жалғастырып жатқанын дәлелдейді", - делінген хабарламада.

Қорықтың мәліметінше, итаю – сусарлар тұқымдасына жататын жыртқыш сүтқоректі. Дене тұрқы 68-75 см, құйрығының ұзындығы 17-20 см. Аяқтары қысқа, табаны жалпақ, жер қазуға бейімделген ұзын әрі өткір тырнақтары бар.

Бауыры қара-қоңыр, арқасы ашық түсті болып келеді. Негізінен ымырт пен түнгі уақытта белсенді тіршілік етеді, алайда салқын мезгілдерде күндіз де қозғалысқа түседі.

Итаю – қорек талғамайтын жануар. Қорегінің құрамында омыртқасыздар мен майда омыртқалы жануарлар (кесірткелер, майда құстар, құмтышқандары, кірпілер, құм қояндары, тасбақалар) кездеседі және өсімдік тамырымен және жемісімен қоректенеді.

Посмотреть эту публикацию в Instagram

Публикация от Устюрт (@ustirt_kz)

Мәтіннен қате тапсаңыз, бізге жазыңыз