Сеулдегі Мишлен жұлдызы бар мейрамхана десертке құмырсқа қосқаны үшін айыппұл арқалады

Оңтүстік Корея соты Evett мейрамханасының басшылығын тамақ өнімдерінің қауіпсіздігі туралы заңды бұзғаны үшін айыпты деп таныды, деп хабарлады The Guardian басылымына сілтеме жасаған KAZ.NUR.KZ.

Сеулдің Батыс округтік соты екі Мишлен жұлдызы бар танымал Evett мейрамханасының операторы мен оның бас директоры Джинни Кимге тағамға құмырсқа қосқаны үшін айыппұл салды. Жәндіктер дәстүрлі корей күріш сусыны — сикхеден жасалған сорбетке топпинг ретінде қолданылған, алайда олар корей заңнамасы бойынша рұқсат етілген ингредиенттер тізіміне кірмейді. Мекемені басқаратын компания 10 миллион вон, ал басшысы 15 миллион вон көлемінде айыппұл төлеуге міндеттелді. Бұған дейін прокуратура бас директорды бір жылға бас бостандығынан айыруды сұраған болатын.

Судья Ли Се Чанг құқықбұзушылықты елеусіз деп санауға болмайтынын атап өтті, өйткені құмырсқалар клиенттерге ұзақ уақыт бойы ұсынылған, мекеме оларды өз жарнамасы үшін пайдаланған, ал зертханалық сараптама жәндіктер құрамында ауыр металдардың нормадан асып кеткенін көрсеткен. Каннамның беделді ауданында орналасқан мейрамхана австралиялық шеф-аспаз Джозеф Лиджервуд бастамасымен ашылған. Аспаз іс бойынша жауапкер болған жоқ, себебі заң бойынша жауапкершілікті тіркелген басшы — оның жұбайы Джинни Ким арқалайды.

Оңтүстік Кореяда тек 10 түрлі жәндікті, соның ішінде шегірткелерді, ұн құрттарын және жібек құртының қуыршақтарын тағам ретінде пайдалануға ресми рұқсат етілген. Құмырсқалар бұл тізімге кірмейді. Тергеу мәліметтеріне сәйкес, мейрамхана кептірілген құмырсқаларды АҚШ пен Таиландтан пошта арқылы алдырған. Сот айыпталушының кінәсін мойындағанын, бұрын сотталмағанын және құмырсқалардың басқа елдердің асханасында қолданылатынын, сондай-ақ мейрамхана басшылығының жергілікті тыйым туралы білмегенін ескерді.

Мәтіннен қате тапсаңыз,бізге жазыңыз