Google аналитигінің TeamPCP хакерлік тобына енуі ауқымды кибершабуылдың алдын алды

ArsTechnica басылымының жазуынша, Google компаниясының Mandiant бөлімшесінің маманы TeamPCP хакерлерінің жабық чатына еніп, мыңдаған компанияға қарсы бағытталған ауқымды бопсалау науқаны мен кибершабуылдарды тоқтатуға көмектесті, деп хабарлады KAZ.NUR.KZ.

Google Threat Intelligence Group (Google қауіп-қатерлерді зерттеу тобы) TeamPCP хакерлік тобына құпия аналитикті енгізу операциясының егжей-тегжейін жариялады. Хакерлер бағдарламалық қамтамасыз ету тізбегіне тарихтағы ең ірі шабуылды жүзеге асырып, ашық кодты кітапханаларды зақымдап, әзірлеушілердің тіркелгі деректерін ұрлаған. Ұрланған ақпарат Trivy, LiteLLM және Checkmarx инфрақұрылымын қоса алғанда, жаңа сервистердің атына кір келтіру үшін пайдаланылған.

2026 жылдың наурызынан бастап Mandiant еншілес компаниясының қызметкері топтың CanisterWorm деп аталатын, бар болғаны 12 адамнан тұратын жабық чатында болды. Аналитик тек бақылау режимінде жұмыс істеп, қатаң шектеулерді сақтады және кибершабуылдарға қатысқан жоқ. Аңду барысында Google сарапшысы 500 мыңнан астам тіркелгі жазбасы бар бұзылған деректер серверіне қол жеткізді. Бұл Amazon Web Services және Microsoft бұлттық платформаларына бұзылған кілттерді жою туралы жедел хабарлауға мүмкіндік берді.

Сонымен қатар желі ішінде болған маман хакерлердің екі факторлы аутентификацияны айналып өту үшін жасанды интеллект көмегімен әзірлеген "нөлдік күн" эксплойтын қолға түсірді. Google осалдықты сынақтан өткізіп, мәліметтерді әзірлеушіге берді және қорғаныс патчын шығаруға ықпал етті.

Топ ішіндегі операция TeamPCP мен ShinyHunters бопсалаушылары арасындағы жанжалдан кейін аяқталды, бұл чатты тазартуға әкеп соқты. Дегенмен аналитик Остин Ларсен жинаған айғақтар тізбегі құқық қорғау органдарына көмектесті. Тамызда Аустралияның Федералдық полициясы ФБР-дің көмегімен топтың екі ұйымдастырушысын тұтқындады.

Мәтіннен қате тапсаңыз,бізге жазыңыз