Toyota жұмысшыларға адам тәрізді роботтарды жаттықтыруды тапсырды, бірақ қызметкерлерді жұмыстан шығармауға уәде берді

ArsTechnica басылымының жазуынша, жапондық автоконцерн 2028 жылдан бастап жылына 6,4 миллиард долларға дейін инвестиция салуды жоспарлап отыр, алайда роботтар адамдармен бірлесіп жұмыс істейтінін баса айтты, деп хабарлады KAZ.NUR.KZ.

Toyota Motor автомобиль корпорациясы инвесторларға өндірісті жаңғырту және автоматтандыру бойынша ауқымды жоспардың алдын ала бағасын ұсынды. Компания есебіне сәйкес, зауыттарды, топ кәсіпорындарын және негізгі жеткізушілерді жаңарту шамамен 400 мың роботты енгізуді талап етеді. 2028 жылдан бастап бұл жобаға салынатын жыл сайынғы инвестиция 1 триллион иенге (шамамен 6,4 миллиард доллар) жетуі мүмкін.

Жоспарланған санға автоконцерннің өз зауыттарына арналған 150 мың құрылғы және серіктес кәсіпорындар мен іргелес алаңдарға арналған 250 мың құрылғы кіреді. Парк дәстүрлі өнеркәсіптік манипуляторлардан және салмағы 50 келі болатын флагмандық дөңгелекті Eley моделін қоса алғанда, ең жаңа роботтардан тұрады. Ол екі саусақты қысқыштармен жабдықталған және тәжірибелі қызметкерлердің қимылдарын бақылау арқылы үйретіледі.

Жұртшылық жұмыс орындары қысқара ма деп алаңдап отыр. Алайда компанияның вице-президенті Хироки Накадзима жобаның мақсаты қызметкерлерді алмастыру емес, машиналар мен адамдар қатар өмір сүретін орта құру екенін мәлімдеді. Роботтарға монотонды және физикалық тұрғыдан ауыр жұмыстарды тапсыру жоспарлануда, ал адамдарға сапаны бақылау және басқару бойынша негізгі міндеттер жүктеледі.

Toyota бұл жоба әзірге бағалау сатысында екенін және түпкілікті инвестициялық шешім қабылданбағанын атап өтті. Егер жоба мақұлданса, компанияның бүкіл әлем бойынша 60 зауытында робототехниканы орналастыру өндірістік желілерді жоспарлы жаңарту барысында кезең-кезеңімен жүзеге асырылады.

Мәтіннен қате тапсаңыз,бізге жазыңыз