Астрономдар орбитасы өзгеріп тұратын сирек кездесетін "ыстық Юпитер" планетасын тапты

Universe Space Tech басылымының жазуынша, Токио университетінің зерттеушілері бастаған халықаралық ғалымдар тобы ерекше эллипстік траекториямен қозғалатын экзопланетаны анықтады, деп хабарлады KAZ.NUR.KZ.

Токио университетінің ғалымдары Норихару Ватанабэ мен профессор Норио Нарита бастаған халықаралық зерттеушілер тобы сирек кездесетін TOI-1355 b экзопланетасын ашты. Бұл нысан "ыстық Юпитерлер" класына жатады және өз жұлдызын небәрі екі жер тәулігінде толық айналып шығады. Сонымен қатар жұлдыздың өзі Күннен әлдеқайда ыстық: оның беткі температурасы 8400 градус Цельсийге жетеді, ал біздің Күнде бұл көрсеткіш 5500 градусты құрайды.

Ашылған жүйенің басты ерекшелігі – газ алып планетасының эллипстік қозғалыс траекториясы. NASA-ның TESS ғарыштық телескобынан алынған деректер планетаның жұлдыз дискісінен дөңгелек орбитаға қарағанда ертерек өтетінін көрсетті. Мұндай созылыңқы орбита басқа ірі аспан денелерімен гравитациялық әрекеттесу нәтижесінде туындайтын планеталардың динамикалық миграциясы теориясын растайды. Уақыт өте келе жұлдыздың толқындық күштері траекторияны біртіндеп тегістеп, оны дөңгелек пішінге жақындатады.

Ғалымдар орбита параметрлерінің үнемі өзгеруіне байланысты TOI-1355 b экзопланетасын шамамен 2033 жылға дейін ғана бақылауға болатынын атап өтті. Жақын арада зерттеушілер орбитаның жұлдыздың айналуына қатысты еңкею бұрышын анықтауды, сондай-ақ "Джеймс Уэбб" ғарыштық телескобының көмегімен қосымша бақылаулар жүргізуге өтінім беруді жоспарлап отыр.

Мәтіннен қате тапсаңыз,бізге жазыңыз