Anthropic компаниясының Claude ЖИ-моделі ДНҚ-ны өңдейтін жаңа ферменттік жүйені анықтауға көмектесті

Anthropic компаниясы өзінің биозерттеу зертханасы бактериофагтардан бірегей фермент тапқанын мәлімдеді. TechCrunch басылымының жазуынша, бұл жүйе CRISPR технологиясы секілді ДНҚ бөліктерін көшіруге және қиып алуға қабілетті, деп хабарлады KAZ.NUR.KZ.

Anthropic компаниясы Сан-Франциско шығанағы ауданында орналасқан биологиялық зертханасының алғашқы ірі жаңалығын жариялады. Claude ЖИ-моделінің көмегімен зерттеушілер бактериофагтардың ДНҚ-сынан бұрын-соңды белгісіз болған ферменттік жүйені тапты. Әзірлеушілердің айтуынша, табылған механизм өз қасиеттері бойынша CRISPR технологиясына ұқсайды және генетикалық материалмен негізгі операцияларды, соның ішінде ДНҚ бөліктерін қиып алу, көшіру және кіріктіру жұмыстарын орындауға мүмкіндік береді.

Anthropic бас директоры Дарио Амодеи бұл жаңалық негізінен Claude нейрожелісінің күшімен небәрі 21 сағат ішінде жасалғанын атап өтті. Биодеректерді іздеу үшін жасанды интеллект шамамен 950 агентті жұмылдырып, 210 миллион токен жұмсаған. Сонымен қатар компания басшысы бұл жұмысты атқару барысында ЖИ бөгде ғалымдардың, атап айтқанда, ұқсас жүйені тапқан Стэнфорд университеті командасының алдыңғы зерттеулеріне сүйенгенін мойындады.

Тәжірибелердің физикалық бөлігін қызметкерлер өздері жүргізді. Зертхана BSL-1 және BSL-2 биологиялық қауіпсіздік деңгейлері бойынша жұмыс істейді және адам үшін қауіпті патогендермен байланысқа түспейді. Бұған дейін Амодеи ЖИ-дің биологиялық қару жасау үшін пайдаланылуы мүмкін екеніне қатысты алаңдаушылық білдірген болатын, алайда нейрожелілердің медицинадағы әлеуеті тәуекелдерден жоғары екенін баса айтты.

Енді ғылыми қауымдастық ашылған жаңалықтың қаншалықты тың екендігін өз бетінше бағалауға тиіс. Болашақта Anthropic ЖИ жабдықтарды адамның тікелей қатысуынсыз басқара алатын толық автоматтандырылған зертханалар құру мүмкіндігін жоққа шығармайды.

Мәтіннен қате тапсаңыз, бізге жазыңыз