Германияда мұғалім су астында сандарды есте сақтаудан Гиннесс рекордын орнатты

34 жастағы Кристиан Шефер тереңдікте дем алмастан, 87 санды жаттап алды. Гиннесс рекордтар кітабының сайтында хабарланғандай, неміс спортшысы экстремалдық жүктемелерді үйлестірудің мүмкін екенін дәлелдеді, деп жазды KAZ.NUR.KZ.

Германиядан келген 34 жастағы математика пәнінің мұғалімі және мнемоника шебері Кристиан Шефер су астында сандарды есте сақтау бойынша жаңа әлемдік рекорд орнатып, Гиннесс рекордтар кітабына ресми түрде енді. Спортшы суға толық батып, демін ішіне тартып тұрған күйі жаттап алған 87 ондық саннан тұратын тізбекті қатесіз қайталап берді.

Сынақ шарттарына сәйкес, Шеферге суға толық батқанға дейін сандық қатары бар ұялы телефон экранына қарауға тыйым салынды. Таймер рекордшы су бетіне шыққан сәтте тоқтатылды, содан кейін ол жаттап алған сандар тізбегін бірден айтып беруі керек болды. Кристиан 87-санға дейін бірде-бір қателіксіз жетті. Мнемоника шеберінің айтуынша, басты қиындық ақпаратты есте сақтауға қажетті уақыт пен өкпедегі оттегінің шектеулі қоры арасындағы тепе-теңдікті сақтауда болды.

Неміс оқытушысының бұған дейін де бірнеше әлемдік жетістігі бар, олардың қатарында үш минут ішінде ең көп телефон нөмірін, сондай-ақ 250 монетаны есте сақтау рекорды бар. Сонымен қатар Шефер өкпеcінің мықтылығын басқа да дисциплиналарда көрсеткен: оған пошта маркасын демімен бір миль қашықтыққа ең жылдам жылжыту рекорды тиесілі.

Кристиан Шефер математика пәнінің мұғалімі болуы оған есте сақтау бойынша тікелей артықшылық бермейтінін атап өтті. Оның айтуынша, мнемотехника шығармашылық ойлауға негізделген, ал су астындағы табыстың басты факторы – жоғары психологиялық және физикалық жүктемені жеңе білу қабілеті.

Мәтіннен қате тапсаңыз, бізге жазыңыз