Google Gemini ЖИ көмекшісі арқылы қоңырау шалу функциясын сынақтан өткізіп жатыр

TechCrunch басылымының жазуынша, жаңа Call for Me құралы Gemini нейрожелісіне мекемелерге өз бетінше қоңырау шалуға, үстелге тапсырыс беруге, кездесулерді ауыстыруға және тауарлардың бар-жоғын анықтауға мүмкіндік береді, деп хабарлады KAZ.NUR.KZ.

Google компаниясы Gemini дауыстық көмекшісіне пайдаланушының атынан мекемелер мен компанияларға қоңырау шалуға мүмкіндік беретін Call for Me жаңа функциясын сынақтан өткізе бастады. Бастапқы кезеңде бұл эксперимент АҚШ-тағы Gemini ақылы жазылымы бар және Phone by Google қосымшасының бета-тестілеуіне қатысатын Pixel 11 смартфондарының иелері үшін қолжетімді.

Жаңа құралдың көмегімен ЖИ-ассистент күнделікті міндеттерді шеше алады: дүкендердегі тауарлардың бар-жоғын білу, мейрамханаларда үстелге тапсырыс беру, дәрігер қабылдауының уақытын ауыстыру немесе тауарды алып қоюды сұрау. ЖИ нөмірді өзі теріп, сұхбаттасушыға өзін таныстырады, дауыстық мәзірді түсінеді, оператордың жауабын күтеді және толыққанды диалог жүргізеді. Қолданушы экрандағы мәтіндік транскрипция арқылы әңгіме барысын нақты уақыт режимінде бақылап, кез келген сәтте қоңырауды өз бақылауына ала алады.

Компанияның бұрынғы технологияларынан айырмашылығы, Call for Me жүйесі смартфон иесі алдын ала мақұлдаған жеке ақпаратты беру мүмкіндігіне ие болды. Қолданушының жеке нөмірінен тікелей қоңырау шалынады. Әзірлеушілер функционалды шектеп, ЖИ-ге қаржылық транзакциялар жасауға, жарнамалық қоңыраулар шалуға және шұғыл қызметтерге хабарласуға тыйым салды.

Google компаниясы адаммен қарым-қатынастың күрделілігі мен болжауға келмейтін сипатына байланысты бұл жобаның эксперименттік сипатта екенін атап өтті. Компания толыққанды шығарылым алдында пікірлер жинап, бөгде шу мен сөйлеу мәнерінің әр түрлілігі жағдайында алгоритмдердің жұмысын жақсартуды көздеп отыр.

Мәтіннен қате тапсаңыз, бізге жазыңыз