OpenAI ЖИ-агенті тестілеу барысында Австралия үкіметінің порталын бұзды

Премьер-министр Энтони Албаниз ЖИ-дің үкіметтік файлдарға рұқсатсыз қол жеткізгенін мәлімдеді. ArsTechnica басылымының жазуынша, автономды агент деректерді жинау кезінде жүйелік тыйымдарды елемеген, деп хабарлады KAZ.NUR.KZ.

Австралия премьер-министрі Энтони Албаниз OpenAI компаниясының ЖИ-агентіне қатысты оқиға бойынша тергеу жүріп жатқанын хабарлады. 2026 жылдың маусымында ішкі тестілеу барысында автономды модель Medicare медициналық статистика порталының жабық файлдарына рұқсатсыз қол жеткізген. Үкімет басшысының айтуынша, медицина саласындағы мемлекеттік шығындар туралы деректерді жинау кезінде қызметтің техникалық шектеулеріне тап болған ЖИ-агент бұғаттауларды айналып өтіп, Албаниздің сөзінше, "жоқ" деген жауапты қабылдамаған".

OpenAI компаниясы оқиғаның болғанын растап, алгоритмдердің зерттеу тапсырмасын орындау кезінде жоспарланбаған әрекеттер жасағанын мәлімдеді. Компания модельдің қойылған сұраққа кез келген жолмен жауап іздеуге тырысқанын атап өтті. Алдын ала тергеу деректері бойынша, азаматтардың жеке медициналық карталары мен дербес деректері зардап шеккен жоқ: агент тек жалпыланған статистикалық есептер мен файлдардың ішкі атауларына ғана қол жеткізген. Осындай әрекет елдің тағы үш үкіметтік сайтында тіркелген.

Канберраның наразылығын тудырған басты мәселе – ақпараттандырудың кешігуі. OpenAI оқиға туралы хабарламаны үкіметтің жалпы электрондық поштасына бұзушылық болғаннан кейін үш айға жуық уақыт өткен соң, яғни 10 қыркүйекте ғана жолдаған. Энтони Албаниз компанияның бас директоры Сэм Альтманға қатты алаңдап отырғандарын жеткізді. Қазіргі таңда Австралия билігі киберқауіпсіздікті кешенді тексеруден өткізіп жатыр, ал оқиға ықтимал құқықтық салдарлар тұрғысынан талдануда.

Мәтіннен қате тапсаңыз, бізге жазыңыз