Германияда металл іздегішке жүгінген әуесқой археолог 934 римдік күміс монетадан тұратын ірі қазына тапты

Smithsonian Magazine басылымының жазуынша, Солтүстік Рейн-Вестфалия жерінен император Адриан дәуіріне жататын, Рим империясының 300 жылға жуық тарихын қамтитын көмбе табылды, деп хабарлады KAZ.NUR.KZ.

Германияда, Кёльн қаласының оңтүстігінде орналасқан Весселинг қаласының маңынан римдік күміс монеталардан тұратын ірі қазына табылды. Бұл олжаны Солтүстік Рейн-Вестфалия жері билігінің ресми рұқсатымен егістік алқабын металл іздегіш құрылғымен зерттеген әуесқой археолог Оливер Ридль тапты.

Алғашқы 15 монетаны тапқаннан кейін Ридль Рейнланд археологиялық ескерткіштерді қорғау басқармасына (LVR) хабар берді. Оқиға орнына келген мамандар топырақ кесегін ішіндегі заттарымен бірге алып, Бонн қаласындағы LVR-LandesMuseum реставрациялық шеберханасына жіберді. Рентгендік түсірілімдер мен кейінгі қазба жұмыстары салмағы шамамен үш келі болатын қазынаның 934 күміс денарийден тұратынын көрсетті. Сонымен қатар сарапшылар керамикалық ыдыстың сынықтары мен ақша сақталған сабанның іздерін тапты, алайда ауыл шаруашылығы жұмыстары кезінде құмыра зақымданған.

Топтамадағы ең жаңа монета біздің дәуіріміздің 124–125 жылдарына, яғни император Адрианның билік құрған кезеңіне жатады, ал ең көнесі Рим республикасы дәуіріндегі б.з.д. 148 жылмен белгіленген. Табылған қазынаның жалпы құны сол кездегі қатардағы римдік легионердің алты жылдық жалақысына тең. LVR басқармасының директоры Эрих Классен атап өткендей, иесі бұл жинағын қауіпсіздік мақсатында көміп, кейін оны қайтарып алуға үлгермей қаза тапқан болуы мүмкін. Қазіргі таңда олжа Бонн қаласындағы мұражайда көрмеге қойылды.

Мәтіннен қате тапсаңыз, бізге жазыңыз