Ғалымдар топырақтағы биологиялық белсенді фосфорды өлшеудің қарапайым әрі арзан әдісін ойлап тапты

ScienceDaily басылымының хабарлауынша, халықаралық зерттеушілер тобы егіншілікті оңтайландыру мақсатында микроорганизмдердің ДНҚ-сымен байланысқан фосфорды талдау әдісін жетілдірді, деп жазды KAZ.NUR.KZ.

Сұлтан Қабус университеті, Джеймс Хаттон институты және Оманның Қоршаған ортаны қорғау басқармасының халықаралық зерттеушілер тобы топырақтағы ДНҚ-мен байланысқан фосфорды (DNA-P) өлшеудің қарапайым әрі үнемді әдісін әзірледі. Ғалымдардың зерттеу нәтижелері Journal of Agricultural and Marine Sciences ғылыми журналында жарияланды.

Фосфор – өсімдіктердің өсуі мен ауыл шаруашылығы өнімділігі үшін маңызды элемент, алайда оның табиғи қорлары шектеулі. Бұл қоректік заттың сақталу, трансформациялану және бөліну процестерін түсіну жердің құнарлылығын сақтау және экологиялық залалды азайту үшін қажет. ДНҚ-мен байланысқан фосфор тірі микроорганизмдермен байланысты органикалық қордың құрамына кіреді және фосфор циклінің ең белсенді бөлігін көрсетеді.

Зерттеу барысында мамандар Ұлыбританияның 32 түрлі топырақ үлгісінде қолданыстағы әдістемені сынақтан өткізіп, оны жетілдірді. Басты жаңалық – артық болып шыққан ферментативтіr өңдеуден бас тарту, бұл дәлдікті жоғалтпай, процедураның құнын айтарлықтай төмендетуге және оны жеңілдетуге мүмкіндік берді. Сонымен қатар DNA-P-ны басқа фосфор қосылыстарынан бөлу үшін қажетті ультрафильтрация негізгі кезең болып қалды. Талдау нәтижелері DNA-P деңгейінің сутегі көрсеткішіне (pH), микроорганизмдер биомассасына және органикалық заттарға тығыз байланысты екенін көрсетті. Жаңа қолжетімді құрал ғалымдарға топырақ құнарлылығын тиімдірек зерттеуге және ауыл шаруашылығын тұрақты жүргізу әдістерін әзірлеуге көмектеседі.

Мәтіннен қате тапсаңыз, бізге жазыңыз