Anthropic ЖИ-і CRISPR геномын редакциялау құралына ұқсас жаңа ферменттік жүйені өз бетінше анықтады

Smithsonian magazine басылымының жазуынша, Claude моделі бактериофагтардың ДНҚ-сынан бұрын-соңды белгісіз ART механизмін тапты, алайда оның биологиядағы нақты қызметі әзірге белгісіз, деп хабарлады KAZ.NUR.KZ.

Anthropic компаниясы өзінің Claude жасанды интеллект моделі молекулалық биология саласында маңызды жаңалық ашқанын мәлімдеді. Генетикалық тізбектердің ауқымды дерекқорын өз бетінше талдау барысында ЖИ бактерияларды зақымдайтын вирустар — бактериофагтардың ДНҚ-сынан бұрын сипатталмаған ферменттік жүйені анықтады. Зерттеушілер жаңа жүйені массивтермен байланысты кері транскриптазалар немесе ART (array-associated reverse transcriptases) деп атады.

Табылған жүйенің басты ерекшелігі — фермент генінің жанында ДНҚ-ның қайталанатын фрагменттерінің болуы, бұл құрылымы жағынан CRISPR геномын редакциялаудың танымал технологиясына ұқсайды. Тәжірибеге 950-ге жуық ЖИ-агент қатысты, олар адамның тікелей араласуынсыз 21,5 сағат ішінде 1,9 миллиард ақуыз кластері бар дерекқорда өз бетінше іздеу жүргізді. Кейін компания ғалымдары зертханалық сынақтар өткізіп, табылған құрылымның бар екенін растады.

Жаңалықтың бірегейлігіне қарамастан, сарапшылар мен әзірлеушілердің өздері ART жүйесінің нақты функциялары әлі анықталмағанын атап өтті. Қазіргі уақытта оның CRISPR сияқты гендерді бағытталған түрде редакциялау үшін қолданыла алатыны белгісіз. MIT және Гарвардтағы Брод институтының молекулалық биологы Фэн Чжан мұндай құрылымдарды анықтау ғылым үшін үлкен қызығушылық тудыратынын және биологиялық зерттеулердегі ЖИ-агенттердің жоғары әлеуетін көрсететінін атап өтті.

Мәтіннен қате тапсаңыз, бізге жазыңыз