Tesla Cybercab роботаксиі мен Optimus роботтарын өндіруді кеңейту үшін 30 млрд доллар несие алды

TechCrunch басылымының хабарлауынша, электромобиль өндірушісі жасанды интеллект пен робототехника саласына инвестицияның артуы аясында ірі банктермен қаржыландыру туралы келісімдер жасасты, деп жазды KAZ.NUR.KZ.

Америкалық Tesla компаниясы жалпы сомасы 30 миллиард долларды құрайтын жаңа несие желілерін ашу туралы келісімдерге қол қойды. Тартылған қаржы компанияның рекордтық күрделі шығындарын қолдауға және жаңа өнімдерді, соның ішінде автономды Cybercab роботаксиін, Optimus гуманоидты роботтарын және Tesla Semi электр жүк көлігін өндіруді кеңейтуге бағытталған.

Компанияның реттеуші органдарға жариялаған мәлімдемесіне сәйкес, қаржылық пакетке Citigroup басқаруымен төлемдерді кейінге қалдыру мүмкіндігі бар үш жылдық 20 миллиард долларлық несие, сондай-ақ Wells Fargo басқаруымен 8 миллиард және 2 миллиард долларлық екі жаңартылатын несие желісі кіреді. Жаңа келісімдер бұған дейінгі 5 миллиард долларлық несиелік келісімнің орнын басты. Tesla қыркүйек айының соңында компанияның бұл желілер бойынша қарызы жоқтығын және 2026 жылы қарыз қаражатын пайдалану жоспарланбағанын нақтылады.

Қолжетімді капиталдың ұлғаюы компанияның жоспарланған күрделі салымдарының өсуі аясында болып отыр, олар 2026 жылы 25 миллиард доллардан асуы мүмкін. Несие ресурстарын толық көлемде игеру бас директор Илон Маскқа Tesla-ны электромобиль өндірушіден жасанды интеллект және автономды робототехника саласындағы көшбасшыға айналдыру процесін жеделдетуге мүмкіндік береді.

Мәтіннен қате тапсаңыз, бізге жазыңыз