Google ең қуатты Gemini 4 Argon жасанды интеллект моделін назарға ұсынды

TechCrunch басылымының хабарлауынша, жаңа флагмандық нейрожелі бағдарламалау, қаржы және киберқауіпсіздік саласындағы күрделі тапсырмаларды орындауға арналған, деп жазды KAZ.NUR.KZ.

Google корпорациясы бүгінгі таңдағы ең қуатты жасанды интеллект моделі — Gemini 4 Argon-ды назарға ұсынды. Нейрожелінің басты технологиялық жаңалығы — бір сұранысқа арналған мәтін лимитінің 1 миллион токенге дейін ұлғайтылуы. Бұл көрсеткіш алдыңғы буын модельдерінен айтарлықтай асып түседі және бір цикл ішінде ауқымды мәселелерді шешуге мүмкіндік береді.

Gemini 4 Argon код жазу, қаржылық талдау, заң құжаттарын әзірлеу және ұзақ бейнематериалдарды талдау бойынша арнайы тестілерде рекордтық нәтиже көрсетті. Әзірлеушілер киберқауіпсіздікке ерекше назар аударды: модель бағдарламалық қамтамасыз етудегі осал тұстарды өз бетінше тауып, оларды жоюға арналған түзетулер жасай алады. Google ішінде Argon негізіндегі агенттер кодты C және C++ тілдерінен қауіпсіздеу Rust тіліне автоматты түрде ауыстыру, сондай-ақ деректер орталықтарындағы жадты пайдалануды оңтайландыру үшін қолданылуда.

Бастапқы кезеңде Google нейрожеліге қолжетімділікті Fairwind бағдарламасы аясында ақпараттық қауіпсіздік бойынша тексерілген мамандардың шектеулі тобына және компания ішіндегі әзірлеушілерге ұсынады. Толыққанды шығарылым мен API интерфейсіне көпшіліктің қол жеткізуі қауіпсіздік тестілерінің сериясы аяқталғаннан кейін жоспарланып отыр.

Мәтіннен қате тапсаңыз, бізге жазыңыз