Ғалымдар динозаврлардың балдырмен қоректенген болуы мүмкін екенін болжады

Қазба тістердің химиялық құрамын талдау ежелгі кесірткелер мен олардың жемтігі құрлыққа шығып қалған мұхит балдырларын жегенін көрсетті, деп жазды SciTechDaily-ге сілтеме жасаған KAZ.NUR.KZ.

Ғалымдар ұзақ уақыт бойы бор кезеңінде өмір сүрген кейбір динозаврлардың тіс эмалінде неге көміртегі изотоптарының деңгейі ерекше жоғары екенін түсіндіре алмады. Құрлық өсімдіктері үшін мұндай химиялық профиль тән емес. Палеонтолог Клейтон Форстер мен оның әріптестері Оклахомадағы Сэм Ноубл мұражайынан алынған ежелгі жануарлардың тіс үлгілерін зерттеп, бұл көрсеткіштің теңіз рационымен тікелей байланысты екенін анықтады.

Дауылдар жағалауға үнемі тонналаған балдыр мен басқа да органикалық заттарды шығарып отырған. Шөпқоректі динозаврлар оларды тікелей жағалауда жеген, ал жыртқыштар бұл шөпқоректілерді немесе жағалаудағы балықтарды жеу арқылы мұхит көміртегін алған. Бұл құрлық пен теңіз экожүйелерінің осыдан 100 миллион жыл бұрын тығыз байланыста болғанын растады.

Мұхиттан құрлыққа қоректік заттарды тасымалдаудың мұндай процесі қазіргі жағалау аймақтарында да бар. Алайда ғалымдар теңіз балдырлары барлық динозаврдың емес, тек ежелгі жағалау сызықтарына жақын жерде мекендеген даралар мен түрлердің рационында болғанын атап өтті.

Мәтіннен қате тапсаңыз, бізге жазыңыз