Сәлемдеме ұрлады деп жазықсыз айыпталған АҚШ тұрғыны ақылды камералар әзірлеушісін сотқа берді

Колорадо штатының тұрғыны Крисанна Элсер автокөлік нөмірлерін оқитын жүйедегі қателікке байланысты Flock Safety компаниясы мен жергілікті полицияға қарсы федералдық сотқа талап арыз түсірді, деп хабарлады Gizmodo-ға сілтеме жасаған KAZ.NUR.KZ.

2025 жылдың күзінде полиция қызметкері Элсерге сотқа шақырту қағазын табыстап, оның 25 доллар тұратын сәлемдемені ұрлағанына жүз пайыз дәлел бар екенін мәлімдеді.

Жалғыз айғақ ретінде қылмыс орнына жақын жерден оның пикапының өткенін тіркеп алған Flock ақылды бақылау камераларының жазбалары көрсетілді. Бұл ретте полиция қызметкері әйелдің алибиін зерттеуден және басқа жазбаларды қараудан үзілді-кесілді бас тартып, кінәсін мойындамаған жағдайда барлық жеңілдіктен айыратынын айтып қорқытты.

Өз кінәсіздігін дәлелдеу үшін әйел көлігіндегі борттық камералардың жазбаларын, GPS-трекер деректерін және смартфонның геопозиция тарихын жинады. Олардың деректері бойынша, ұрлық кезінде ол ательеде болған, ал сәлемдемені жаяу жүргінші ұрлаған.

Тек екі аптадан кейін, дәлелдемелері бар жазбаша өтінішті алған соң, жергілікті полиция бастығы айыптауды жойып, қол астындағы қызметкердің қателігін мойындады, кейін оған сөгіс жарияланды.

Талапкер бақылауды шектеуді және Flock Safety компаниясын полицияға деректерді бермес бұрын сот ордерін талап етуге міндеттеуді сұрады. Бастан кешкен стресс салдарынан әйелдің шашы түсіп, қатты арықтап кеткен және қаржы саласындағы жұмысынан айырыла жаздаған.

Flock компаниясы өз кінәсін мойындамады және олардың жүйесі автокөлікті дұрыс анықтағанын, ал деректерді интерпретациялаумен құқық қорғау органдарының өздері айналысуға тиіс екенін алға тартты.

Мәтіннен қате тапсаңыз, бізге жазыңыз