1,9 миллион жыл бұрын болған қоныстану мекені адам эволюциясының тарихын өзгертті

Халықаралық зерттеушілер ертедегі адамдар Иордан өзенінің маңын шамамен 1,9 миллион жыл бұрын мекендегенін анықтады, деп жазды ScienceDaily-ге сілтеме жасаған KAZ.NUR.KZ.

Иордан өзені маңында Галилей теңізінің оңтүстігінде орналасқан Убейдия археологиялық ескерткіші адамдардың Африкадан тыс жерлерге ерте миграциясының хронологиясы туралы ғылыми түсінікті өзгертті. Иерусалимдегі Еврей университеті, Хайфа университеті және Талса университеті мамандарының жаңа бірлескен зерттеуі қоныстану мекенінің жасы кемінде 1,9 миллион жыл екенін көрсетті.

Бұған дейін Убейдияның жасы жанама геологиялық салыстырулар негізінде тек 1,2 миллион мен 1,6 миллион жыл аралығында деп бағаланған еді. Нақты уақыт шеңберін анықтау үшін профессорлар Ари Матмон, Омри Барзилай және Мириам Белмакер бастаған халықаралық ғылыми топ тәуелсіз үш аналитикалық мерзімдеу әдісін біріктірді. Мамандар минералдардағы космогендік изотоптарға талдау жасады, тұщы су моллюскаларының қазба қалдықтарын уран-қорғасын әдісімен мерзімдеді, сондай-ақ көне көл түбі шөгінділеріне палеомагниттік зерттеулер жүргізді.

Жаңа даталар Убейдияны Грузиядағы әйгілі Дманиси тұрағымен бір қатарға қойып, екі орынды да адам ата-бабаларының африкалық құрлықтан тыс жерде болғанының ең көне дәлеліне айналдырды. Бұл ретте Убейдиядан ашель мәдениетінің тас балталары табылды, ал Дманисиде қарапайым олдувай құралдары қолданылған. Бұл ежелгі гоминидтердің түрлі популяциялары Африкадан бір мезгілде бірнеше толқынмен шығып, өзара мүлдем бөлек тас өңдеу дәстүрлерін ала келгенін дәлелдейді.

Мәтіннен қате тапсаңыз, бізге жазыңыз